AI唔再係你嘅敵人，而係幫助你嘅好朋友！近月，唔少行業人士都埋怨同擔心將來可能會畀AI取代工作，所以積極增值自己。而LinkedIn最近為Premium收費訂戶推出一項實驗性AI功能，用戶可以輕鬆「獲得」具個人特色嘅求職信，提高得到工作嘅機會。搖身一變，AI變成幫你搵工嘅好幫手！
求職者一條龍AI服務
Premium用戶只需要喺LinkedIn求職頁面上嘅「由AI起草發給招聘團隊的訊息」新選項中輸入個人資料、感興趣嘅公司、職位資訊同描述等訊息，網頁就會運用AI生成高度個性化嘅訊息草稿。用戶就唔需要花更多時間為每份有興趣嘅工作個別寫求職信，生產力大大提升！不過，LinkedIn強調「個人特色」好重要，所以用戶應該仔細檢查同編輯文本，以免出現千篇一律嘅「倒模」文章。
LinkedIn亦提供其他AI相關功能，如個人資料Profile嘅自我簡介、AI職缺推薦及AI面試練習等，多方面協助用戶更自信地展示自己嘅能力、儘快搵到合適工作，從而展開更好嘅職業生涯。
AI生成招聘訊息
除咗求職者外，僱主都可以運用AI功能幫幫手。LinkedIn嘅「AI職位描述生成工具」會根據僱主提供嘅職缺名稱、公司名稱、工作場所類型、工作型態同地點等資訊，生成更理想嘅職位描述訊息。咁樣，HR同事就可以減少撰寫時間，花更多心力喺其他工作上。
求職者同僱主不妨試吓用AI生成功能提高生產力，可能會得到更理想嘅收穫！
