Amazon繼1月後再次裁員｜牽涉多個部門及高達9,000人

Amazon繼今年1月裁退咗18,000名員工之後，琴日宣佈最新一輪裁員規模將於未來幾星期內進行，涉及職位多達 9,000 個，受影響嘅部門包括人力資源、雲端計算部門、廣告部門同遊戲直播服務 Twitch 。CEO Andy Jassy提到今年首要年度計劃就係「精簡」，同時繼續大力投資於長期客戶體驗。

Amzon CEO Andy Jassy 表示裁員行動最快會喺4月中下旬先會完成，而受影響員工係唔會獲得事前通知。Amazon 承諾會為被裁員工提供遣散費、過渡性健康保險，並協助佢哋喺其他地方搵工。Twitch CEO Dan Clancy 提及會炒400幾名員工，佢表示同好多公司一樣， Twitch 受整體經濟環境影響，使用者同收入增長追唔上公司預期，因此作出縮減員工規模嘅艱難決定。

因此 Amazon 希望更加精簡將資源投放喺更好體驗上，但Andy Jassy表示，佢仍然對公司最大嘅業務、零售同 AWS 以及其他繼續值得投資嘅新部門持樂觀態度。