自從馬斯克接管咗 Twitter 之後就不斷有裁員嘅新聞，由原本舊年10月份嘅7,500人而家裁減至大約2,000人左右。而今日有位 Twitter 員工 Halli Thorleifsson就喺 Twitter 上公開咁問馬斯克「自己係咪俾人炒咗」，佢表示問埋HR都話唔肯定，搞到佢被迫出此下策。
45歲嘅 Halli Thorleifsson 原本係 Twitter 嘅產品設計高級總監。佢表示9日前嘅星期日朝早，佢打開電腦，見到屏幕係灰色並被鎖定，咁表明佢嘅Twitter賬戶被鎖。於是幾日之後，佢開始聯絡馬斯克同HR主管查詢佢嘅情況。HR主管已經透過電郵回覆咗兩次，但一直無法回答Thorleifsson係咪Twitter嘅員工，而馬斯克就冇覆過佢嘅電郵。最終，Thorleifsson喺唔知仲有咩方法嘅情況下，唯有喺Twitter發文並標記馬斯克，希望得到佢嘅回覆。
帖文內容（小編非專業翻譯）：「親愛嘅馬斯克，9日之前我同另外200位同事部電腦已經失去工作權限。對於我仲係咪受聘於依間公司，你嘅HR主管又答我唔到，你又唔覆我電郵。希望夠多人轉發我依個帖文等你會喺依度答我？」
馬斯克嘅回應：「你之前係負責啲咩架？」
Thorleifsson：「Figma，所有進行緊嘅設計工作。」之後馬斯克就咁覆咗2個笑喊就算。
馬斯克之後就回覆返，話佢需要相嚟證明佢嘅表現，否則就當冇發生過。之後Thorleifsson回應，由於電腦被鎖，無法提供相或證據。最後，馬斯克用一段 1999 年喜劇《The Office》中嘅片段作為回應。
喺依個Twitter上嘅對話完咗之後冇耐，Thorleifsson 話 Twitter 嘅HR部門聯絡咗佢，指佢已被解僱。
其實 Thorleifsson 喺 2014 年創立設計公司 Ueno並喺 2021 年賣咗俾Twitter，作為收購嘅一部分，佢成為咗 Twitter 嘅全職員工。Thorleifsson指佢決定出售有幾個原因，但其中之一係佢患有肌肉萎縮症，可能得返幾年時間可以工作，佢希望 Twitter 會根據合約向佢支付尚欠嘅錢。
