日本企業允許員工從事副業｜做YouTuber賺錢都冇問題

日本一間大型貿易公司三井物產近日放寬咗公司政策，允許員工從事副業，可包括教練、YouTuber或藝人等。此舉反映出公司採取更靈活嘅工作政策，以便喺人口下降嘅情況下吸引年輕員工。

三井物產喺一份聲明中表示：「喺實施遙距工作同彈性工作時間政策後，我哋認為係時候做更多嘢，咁樣員工就可以追求職業發展同新嘅工作方式。」 

員工嘅副業可包括教練、喺科技初創公司工作以及成為YouTuber等，並指員工嘅任何副業都應該增加員工嘅技能同經驗，而唔止係增加收入，並且必須得到管理層嘅批准。根據三井物產最新嘅年度報告，三井嘅員工平均年收入約為1480萬日元（約90萬港元）。

除咗三井，日產汽車製造商同ANA航空公司等一些日本企業已經允許兼職工作。