Microsoft前HR副主管：被炒唔應食回頭草

今年好多科技巨頭都進行大裁員，繼Twitter炒咗一半人之後，Meta亦宣佈大幅裁減1.1萬名員工，另外有消息指Intel今個月都會宣佈裁員。作為打工仔俾人炒仲應唔應該返去？Microsoft前HR副主管Chris Williams教打工仔「唔好俾人呃兩次」，以下俾大家參考。

Chris Williams提醒外國職場有句諺語係話「呃我一次，你可恥。騙我兩次，係我蠢」，打工仔揀職業，應該避免返去嗰啲曾經炒過你嘅公司；佢認為即使食回頭草，都要分析當日被炒嘅原因，衡量形勢先做決定。

佢認為，如果當日公司係有理據咁炒你，咁打工仔唔應該再返去，因為當中炒你嘅原因係冇變過。不過，如果當日只係遣散，咁你就要諗下，今日依間公司從事啲咩業務，你喺依間公司，又可以做咩角色。

重要嘅係，當日解僱或遣散時嘅處理過程，係咪顯得深思熟慮同體諒被炒嘅員工，如果你被炒當日「即時上唔到Zoom」、「開唔到Email」，甚至即日拍卡已經「入唔到公司」， Chris Williams覺得依類公司「好打極有限」。