相信大家都有留意到最近台灣人被騙到柬埔寨嘅事件，可能大家會覺得自己唔會咁蠢被騙，但如果依啲事真係發生喺你身上，當局者迷，你未必可以冷靜分析，以下會詳細講解香港嘅騙案過程、手法、受害人心路歷程等，希望大家真係會睇晒篇文了解多啲，唔好覺得唔關自己事或唔會咁易上當，睇咗可能佔你幾分鐘，但真係被騙嘅就唔知會係幾多分鐘，亦都希望大家share出去，唔好俾佢哋受騙，救得一個得一個。
先講一下Channel C HK嘅案件，有兩位受害者就分別以唔同手法被騙去泰國同緬甸，受害者A首先俾朋友呃咗去泰國，聲稱係一齊旅遊，話到埗會有人帶事主搵佢，點知帶帶下就由泰國車咗去緬甸，一車就返唔到轉頭。另一個受害者B又係俾朋友呃去泰國，話一齊去商場食飯，點知架車行咗相反方向，然後有3､4個持槍人士攔截佢哋，朋友去嘗試溝通後就俾槍殺咗，之後受害者B就當然被捉去詐騙。
佢哋個工作模式就係要呃人喺虛擬嘅交易所投資，又或者呃其他人過嚟。有受傷人頂唔順唔想再繼續呃人，每日擔驚受怕，好想自行了斷自己生命，叫屋企人唔好救佢，處於一個極度絕望嘅狀態。
工作劇本詳情：
如果唔聽話嘅，不論男女都要俾人毒打，女仔仲會被多次強姦，最後就會賣咗你俾其他公司繼續行騙，又或者割出受害人嘅器官拎去黑市賣，屍體就會棄置於海中心。事主每日都要糾結自己到底要點做，又唔想害人，又想自保，自己都十分矛盾。
全片觀看：
另一個係香港 YouTuber LLOTALK嘅片，有位觀眾就搵L佬，指自己讀書時期嘅師兄無啦啦搵佢，話柬埔寨嗰邊難搵IT人，所以就想邀請事主去嗰邊做IT有關嘅工作。
最後L佬同佢傾傾下就發現唔對路，好大機會係騙案，於是就想佢傾電話勸事主唔好去，將佢由夢想中拉出嚟。近年好多香港人，尤其係年輕一代都好想移民或去其他國家working holiday，但係大家真係要做好research，唔好俾認識嘅人講兩講就信，始終防人之心不可無，試諗下如果你係老細，你會請一個人工低啲嘅印度籍IT人定係人工高啲嘅香港人？假設大家做嘅嘢差唔多，老闆們一定會慳成本，仲要係包食包住包機票又高薪厚職，其實你覺得有冇可能？再加上睇埋地區，東南亞國家嘅生活水平唔高，可以俾嘅薪金一定唔會高得去邊，所以大家就算遇到熟人都唔好咁易相信。
全片觀看：
小編有感而發：
騙案真係無處不在，好多時網民睇到騙案就會留言話「咁蠢都有人信」、「係咪冇腦？」、「貪心嘅下場」等等，其實依啲留言一來對件事毫無幫助，另外亦都會帶俾受傷人二次傷害，佢哋遇到依啲不幸事件已經好慘，我諗如果係當局者，你可以理性思考嘅能力會降低，而且亦會考慮好多因素，就咁評論兩句當然容易，做決定就難。點解有人出事，要blame the victim而唔係安慰佢哋，又或者盡自己能力去幫佢哋。每件事我哋都要學識fact check，查清楚公司背景、工作性質、規模等，正常一間公司，係唔會咁貿貿然請一個三唔識七嘅人，唔洗CV唔洗了解就請，其實都十分唔合理。另外要去東南亞國家旅行嘅都要小心，因為當地受疫情影響，好多人會捉遊客去賣錢過活，唔止去「工作」，旅行都有危險，真係暫時唔好去會比較好，有人同行都唔安全，因為對方係有槍去綁架你，你只係赤手空拳。如果大家身邊有人相信依類騙案，或者佢較易信人，請你share依篇文章/send YouTube片俾佢知發生緊咩事，鬧醒/提醒佢唔好走上不歸路！
資料來源：Channel C HK、 LLOTALK
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
