天文台預告，考慮喺今晚（8月24日）6點至9點之間改掛八號烈風或暴風信號。到底如果發出8號風球，打工仔可唔可以提早收工？改發3號風球時又要幾時之內返工？等小編根據勞工處《颱風及暴雨警告下工作守則》話俾大家知啦。
【Q1】天文台預告掛8號風球有冇得提早收工？
根據勞工處《颱風及暴雨警告下工作守則》，當八號預警或八號信號已發出，除必要人員外，僱主應盡快安排僱員分批下班；對有特殊需要的僱員（例如懷孕、殘疾、居住地點交通不便或其他有需要的僱員）作優先及彈性處理。
守則又列明，如工作地點因惡劣天氣有潛在安全風險，僱主應安排他們返回安全地點，僱主亦應為須往返工作地點嘅必要人員提供交通津貼或支付實際交通費用。
【Q2】改發3號風球後何時要上班？
勞工處守則寫明如果8號颱風警告、黑色暴雨警告除下時間距離下班時間不足3小時，就唔洗返公司，否則各位打工仔要喺落波後2小時內返到公司。勞工處指員工必須留喺安全地方，並無提及唔洗返工，因此喺取消或轉發惡劣天氣警告，如僱主要求員工喺安全情況下返到公司，並冇違反《僱傭條例》。
【Q3】在家工作又是否要上班？八號風球可唔可以WFH？
《職業安全及健康條例》訂明，僱主有責任為員工提供安全嘅工作環境。所以僱主要作出彈性處理，例如考慮留家工作。如果打工仔有合理證明家中唔安全，僱主就唔可以要求僱員繼續WFH。
守則指出，因應個別機構運作模式及唔同職位工作性質，僱主應預早評估容許僱員於有需要時在家工作嘅可行性，訂明適合在家工作僱員嘅工作範疇和模式，以及喺邊啲情況下啟動在家工作安排，而過程中諮詢員工和考慮個別僱員需要，例如懷孕或殘疾僱員等。
【Q4】八號風球要返工？
根據勞工處守則，如惡劣天氣警告喺工作時間開始前發出，僱主唔應該要求員工返工，除非有事先協定工作安排。如僱員因天氣關係未能返工，僱主要酌情處理。所以各位打工仔應該喺風球發出前同僱主協定工作安排啦。
如行業性質需要喺惡劣天氣下工作，僱主就需要盡量將當值人數減至最少，只要求必需嘅人員返工。
【Q5】在惡劣天氣警告下，遲到會被僱主扣人工？
僱主應體諒僱員嘅情況而作出彈性處理，如容許返公司有困難嘅僱員在家工作，或安排寬裕嘅上班時間。
對於因惡劣天氣而未能及時返工嘅僱員，僱主唔應該無故唔出糧、勤工獎、津貼，或扣減僱員喺《僱傭條例》下享有嘅年假、法定假日、或休息日以補償損失嘅工作時間。如僱主擔心僱員濫用機制而故意遲到，可以協商以工作時數補回遲到時間。
【Q6】僱主不依守則有否犯法？
由於守則不具法律約束力，僱主可以自行選擇是否跟隨，但法例列明「前4後4」，即係喺八號或以上颱風警告、紅色或黑色暴雨警告生效期間，員工喺工作時間開始前或終止後4小時內，喺往返工作地點以及居所途中，如果遭遇意外受傷或死亡，僱主必須負起《僱員補償條例》嘅補償責任。
