打工仔返工返得咁辛苦，做完冇糧出真係㷫過火屎！如果僱主唔出糧或者扣人工，佢會受到咩刑責呢？僱員又可以點樣保障自己？今朝就有地盤工人喺黃大仙竹園道掛起橫額，寫住「有汗出無糧出」字句，為追討連日嚟嘅薪金！另外，勞工處今日起實施「預防工作時中暑指引」，僱主又有咩法律責任？
一名地盤工人向傳媒表示，佢哋負責路政署工程項目，主要興建一條橫跨竹園道、連接鵬程苑同竹園南邨嘅天橋，而當中超過10名工人被欠薪超過一星期！原來佢哋上星期曾經同判頭反映出糧問題，之後判頭應承咗會處理，點知到最後又反口。所以，決定今日將行動升級，希望追返薪金。佢仲話，如果判頭依然唔肯出糧嘅話，會考慮去勞工處請願。
另一方面，勞工處新推出嘅「預防工作時中暑指引」今日起實施，當唔同等級嘅工作暑熱警告生效時，僱主要因應僱員嘅勞動性去作出休息安排，黑色警告下甚至要停工。勞工處副處長馮浩賢提醒僱主應該同僱員討論「防中暑措施」。如果僱主刻意唔跟指引，僱員可提出投訴，處方會跟進同埋透過職安健條例檢控。
佢又話，天氣屬於無可避免又不可控嘅自然現象，僱主可提供遮蔭或者加裝散熱設備，減少警告生效時嘅停工時間，唔應該因停工而扣減僱員人工。
勞工法例中關於工資嘅違例與罰則：
- 僱主如故意及無合理辯解而不依時支付工資給僱員，可被檢控，一經定罪，最高可被罰款 35 萬元及監禁 3 年。
- 僱員如果超過 1 個月仍未獲發已到期的工資，可當其僱傭合約已被僱主終止，僱主須支付僱員解僱代通知金及其他解僱賠償。爲避免爭議，僱員在行使這條文所賦予的權利時，應先向僱主表明他的決定。
- 僱主如非法扣除工資，可被檢控，一經定罪，最高可被罰款 10 萬元及監禁 1 年。
Follow「Sick Leave Tomorrow」，即刻收到職場新資訊！
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
我哋啱啱出咗手機App呀，方便各位IT人搵工～快啲撳下面條Link Download啦！
https://sickleavetmr.com/web/download-app/
