#讀者投稿
啲人成日話高分低能，唔知算唔算好彩，我一路未遇過，直到2星期前終於見識到，仲差啲搞到我俾人炒…
我上年啱啱grad，朋友介紹下去咗間MNC獵頭公司度做，full time嚟講我年紀最細，所以有啲junior嘅位多數都叫我幫手搵。有日300磅嘅肥佬老闆同我講：「Rachel你夠後生，幫手搵個fresh grad俾個Banking客，個line manager係單身老女人嚟好鬼難頂，搵個蠢少少挨得鬧嘅小鮮肉俾佢就啱，唔好咁醒，太醒會好快知中伏就轉工，要補replacement就煩。同埋phone in得啦，唔好叫個candidate上嚟阻住間房。」
肥佬老闆叫我top priority去搵咗呢個空缺先。老實講，明眼人一睇就知豬頭骨嚟，請fresh grad張單唔大得去邊，但係個客就多多要求，不過老闆指明叫我搵，仲可以點？我唯有皮笑肉不笑咁答老闆：「好呀，應該唔係好難，我盡快俾人你呀老闆！」肥佬老闆好開心咁話：「Good！夠正面，我睇好你啊呀妹！畀心機，今個星期俾3個candidates我。」我心諗知你鍾意聽呢啲嘛…唔通我反咗3次白眼又話你知咩。
最後我搵咗一個星期，又真係畀我搵到3個candidates畀老闆，2男1女。肥佬老闆print咗嗰3個candidates嘅CV出嚟，拎嚟喺我面前講：「女嘅，唔要。」跟手喺我面前撕咗個女仔份CV，我大驚心諗：「啱啱print出嚟就撕咗佢，咩玩法？」我仲未回過神來，老闆又拎起一個男candidate份CV，接住講：「呢個囝囝個樣咁醒，應該做唔得耐，唔要。」又撕咗其中一個男candidate份CV。最後佢望住最後一個叫Richard嘅candidate份CV不停點頭，跟住講：「呢個啱用。」 Richard我都覺得係最有機會，事關佢啱啱CU Master畢業，睇相就瘦瘦地嘅四眼仔，有少少似坤哥，唔係話好靚仔，不過睇落都係斯斯文文幾正常，學歷唔錯，expected salary又啱個客budget，仲要immediately available。肥佬老闆繼續講：「呢個Richard有學歷得嚟個樣夠毒，似係唔識搏咀，啱呀呢type!」結果好快手就約咗第二日下午2點半interview。
由於之前太多人成日甩底、遲到、唔識路等等嘅大小問題，搞到HR成日打俾肥佬老闆，老闆又問到我口啞，所以我每次都會提早少少打畀candidate問下佢到邊，有冇咩特別問題咁，今次都唔例外。面試約咗喺下午2點半，咁我就大概2點打畀Richard，問佢大概位置，咁Richard就話佢已經到咗附近，打算行一陣差唔多夠鐘就上去見工。好啦，我聽到咁都好放心，加上我都phone in過佢都應該冇乜大問題，諗住今次終於事成啦掛。
點知到咗3點，肥佬老闆就收到HR嘅電話，嗰陣我心諗：「咁快就見完？半粒鐘咋喎…」咁肥佬老闆就聽咗電話，HR就話：「個Richard冇嚟到喎，佢有冇通知你佢會遲到定點？」肥佬老闆用眼神勵一勵我，再同HR講：「吓，無理由㗎，我地2點打畀佢已經到咗附近喎，佢仲話轉頭上嚟嘅～」HR：「唔知喎，佢真係冇到，一係你打去了解吓。Line manager(即老女人)發緊我脾氣…」一收線肥佬老闆碌大眼望住我，撟起雙手，凸起肚腩，我就知出事。
我即刻打畀Richard：「喂，你喺邊啊？」
Richard：「我？仲喺中環啊～」
我：「吓，你做乜唔去見工啊？頭先又話轉頭上去嘅？」
Richard：「哦～係呀，但我等等吓，個天突然間落雨，我又冇帶遮，咪諗住等佢停雨再上去囉～」
我：「吓，我地office都係中環，出面落毛毛雨咋喎。咁你等到咁上下都未停，你唔買把遮？」
Richard：「哦～因為我諗住佢應該係過雲雨，廢事特登嘥錢買把遮嘛…」
我：「咁你等到就夠鐘都未停，做乜唔衝上去，反正都係3分鐘路程…」
Richard：「哦～因為我唔想整濕個身，呀媽話濕咗再入冷氣房好易病，同埋諗住佢就停，咪繼續等囉…點知到而家都未停雨…」
我：「點解你唔考慮打電話話聲我知會遲到呢？」
Richard：「打咗俾你都唔會即刻停雨，咁打嚟做乜？」
我收線之後肥佬老闆就質問我：「你個Richard點呀？」我尷尬咁話：「Richard佢要避雨…所以無上到去interview…」肥佬老闆碌大對眼，跟住話：「避雨？出面毛毛雨咋喎，唔去又唔出聲？你個candidate no show嚟講都係世一，咁on_嘅原因都講得出，仲要讀Master，佢個Master呃返嚟㗎？」之後我聽到呆晒，都唔記得之後嘅對話，最後唯有肥佬老闆打返畀HR成隻狗咁say sorry。我都超唔好意思，諗緊係咪要畀人炒…不過肥佬老闆見慣世面，好快都收拾心情，叫我快啲再搵過第二個，無再追究。
見人多過見字嘅我今次真係點估都估唔到，竟然讀到Master會因為落毛毛雨又唔想嘥錢，明明到咗附近都可以no show。。。
有任何返工遇到嘅奇怪/搞笑/難忘經歷，歡迎投稿：https://forms.gle/siyqJ9UWaKjG7SEP9
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
