記得想當年仲係讀緊書，遇上疫情好嚴重冇乜公司會請人，咁我有朋友就話我知佢公司個marketing同事啱啱遞咗信，Team Head急需個marketing嘅人pt做住先，佢會請返個ft返嚟。但係個Team Head好高要求，要好合佢眼緣先會請，所以請極都唔啱。咁我嗰陣想賺下外快，出面好多公司都唔請人，所以都心郁郁想試下做。
但係問題就嚟啦，我冇乜做過marketing嘅經驗，唔識得整圖，淨係剪過少少片同埋識用幾個photoshop功能咁大把，好驚自己做唔嚟。於是我就問嗰個fd
我：「但係佢洗唔洗整到啲圖好靚㗎？我冇整過圖喎，同埋剪片都只係識少少，唔pro㗎喎〜」
Fd：「唔會㗎，佢整嗰啲圖好簡單㗎咋，你一定得㗎！」
之後佢開咗公司個page俾我睇，啲圖又真係好普通，唔明點解咁都出得街…咁我就應承咗佢試吓，約咗幾日後interview。因為我本身幾有興趣喺依方面發展再加上搵唔到工，所以我都幾想見得成，於是我interview嗰陣就口多多講咗啲工作以外嘅技能，話我識整埋website，依件事我後悔到而家…
——————————————————————————————————————————————————————
講一講個Team Head份人先，佢份人好心急同時又好多天馬行空嘅idea，但係份人毫無美感可言，對顏色嘅觸覺仲好差，所以好難滿足到佢，依份$65嘅pt都幾蝦人做。上一手就用開Canva去整圖，咁我冇用開唔知點搵啲template，所以開頭啲圖都係7下7下，後尾做熟咗就好快出到一張圖，點知佢就要我整好多無謂嘅poster講緊一日6至10張不等，仲要出埋fb ig嘅post同剪片拍片，總之就忙到尿都冇得屙。每日食飯都邊做邊食，長期每日都好急尿到放工先有時間屙，我返咗一個月因為忍尿忍到尿道炎，講緊我一星期淨係返兩三日…
到咗返工後期，開始完咗最忙嘅時期，每日可能整啲好basic嘅poster唔算太忙，之後Team Head私底下有開一間美容院同顧問公司，佢就叫我幫佢整合美容院啲產品出fb ig post，佢淨係俾咗個美容院product menu我，其他都要我自己搵，首先又要搵圖，搵完又要整張圖去介紹，之後打caption又要時間，講真真係要好多時間出一個post，佢要我一日整6個真係又到返尿道炎嘅時期，收到佢個msg就燥咗，做freelance都幾百蚊一個啦大佬，真係蝕到入肉。仲要當初話做咗幾個月會加我人工，頂佢做咗大半年都冇加過，有時星期六日拍嘢得兩三粒鐘又計$65蚊一粒鐘，真係車錢都蝕埋。
之後我照忍，雖然Team Head駛人駛到盡，但平時開完會會買下cake俾我哋，間唔中又會請食lunch同放工車埋我哋，都衰唔晒。又過多一個月，Team Head突然叫我幫佢整website，我平時freenlance整個website幾千蚊一個，但成本只係兩日左右，而家咁計65蚊一粒鐘，我整一個禮拜都回唔到本。我十萬個唔想幫佢整，但又完全搵唔到點樣可以拒絕，於是我就死死地氣咁幫佢拖長咁整，同時亦都同自己講咗做埋今個月就唔撈。
依個Team Head好麻煩，正正就係佢咁天馬行空，成日都要改嚟改去，其實一個改動可能要好花時間/好麻煩去整，一時又要依個名，一時又話睇落好怪想改過個，一改就幾個page一齊改，真係改到好鬼燥。最後我求其幫佢整完之後就用畢業搵到其他offer為由辭職，雖然佢係咁挽留我，啲說話講到幾好聽都好，但係我真係唔會再俾佢壓榨我！！
最後，喺我臨走之前，有個新請嘅full time嚟接我手，喺交接期間，佢要我教埋個新仔點樣edit個website，話廢事成日麻煩我，佢真係完完全全一個商人，雖然我蠢，但我都蠢唔晒，加上我見到新仔面有難色，於是我用咗個藉口推咗佢，話一般人未學過唔會識整，叫佢有咩就叫我改啦。到咗而家佢都仲係用$65時薪去叫我幫佢改…所以話千祈唔好俾老細知你有幾多工作以外嘅技能…
——————————————————————————————————————————————————————
有任何返工遇到嘅奇怪/搞笑/難忘經歷，歡迎投稿：https://forms.gle/gX2kGmhzmbaYXRxt6
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
