話說我後面個位係一個UX Designer叫Amy,咁有一日佢就喺度打緊個網站Layout,咁其實普通打工仔都要成日打逗號,更何況佢呢。由於佢打字好鬼快,加上佢嗰日打到興高采烈之際,應該唔小心撳到啲咩short cut,佢就無啦啦大嗌…
Amy:「哇!我個逗號冇咗呀!點算呀!搞咩呀〜〜〜」
由於佢平時都好多嘢講,成日都冇乜人理佢,所以當時我哋都冇反應,之後佢講多幾次,事態好似好嚴重咁,我哋先𥄫下佢咩事。
Amy:「唉呀搞乜鬼!我個逗號升咗上天呀救命!!」
我哋全部人去晒佢個位,Amy即刻示範去打個逗號,真係出唔到,出咗個升天嘅逗號,類似咁樣「 ‘ 」再長少少。解釋返先,唔知係咪因為Amy打拼音嘅,佢聲稱啲標點符號會同鍵盤掣嘅符號有啲出入,姐係要打逗號,唔係撳逗號掣,而係撳其他符號掣,Amy喺正常情況下係撳引號掣就會打到逗號。
但係好唔好彩地,佢而家撳極個引號都出唔到逗號,打逗號鍵都出唔到逗號。佢話試過晒所有符號都出唔到逗號,於是我哋就幫佢Google下啦,試過所有教學都唔得…於是Amy就搵咗我哋公司全能嘅IT同事Jason哥幫手。
——————————————————————————————————————————————————————
Jason哥:「點啊〜搞咩呀你?」
Amy:「Jason哥〜〜我個逗號升咗上天呀〜點算呀〜〜〜」
Jason哥:「你係咪撳咗啲咩快捷鍵啊?」
Amy:「我唔知啊,打到興高采烈嗰陣就無啦啦升咗天啦〜〜」
之後Jason哥就拎起個鍵盤試,又撳咗唔同嘅掣,我都唔知佢做咗啲咩,總之佢檢查完之後就話
Jason哥:「搞唔掂啊,你而家一個逗號都冇呀?」
Amy:「唔係嘅,升天之前打到一個未升天嘅逗號。」
Jason哥:「咁得啦,你打開個備忘錄啦,跟住copy個逗號過去,以後都copy n paste」
我哋全部笑到仆街,本身佢形容為升咗天已經好好笑,Jason哥仲要玩9佢,叫佢以後copy n paste😂😂😂😂然後Jason哥真係開咗個備忘錄叫Important,仲幫佢copy埋個逗號,叫Amy set 密碼,話個逗號好重要,係佢last一個打到嘅逗號😂😂
Amy:「唔係掛,連你都幫我唔到,我唔要copy n paste啊,我想要返個逗號咋〜〜」
最後Jason哥唔知亂撳咗啲咩,最後喺正常逗號鍵撳到個逗號,之後Amy都好不滿
Amy:「吓,咁我咪要重新適應過晒啲鍵??唔制呀Jason哥」
問題就咁就解決咗,我哋都返埋位做嘢,而Amy都被迫適應緊正常嗰個鍵盤掣。