喺十幾二十年前,唔少公司均採取5天半或長短周工作模式。而現時,5天工作周已經係香港大部分工種嘅入職基本條件。近年人力資源短缺,部分歐洲公司更推出4天工作周作為福利及挽留員工嘅方法。有調查亦指,原來唔少人願意減人工換4天工作周,但遙望將來,又係咪明智呢?
人力資源公司Manpower Group早前做咗一個勞動力趨勢調查報告,發現全球好多地方皆面臨人才不足問題,而「靈活性」亦開始成為員工追求嘅工作條件之一,所以有公司推出「4天工作周」去降低支出及吸引人才。另外,有40%嘅受訪者表示,願意用5%人工去換取一星期只返4日工。
相信唔少香港打工仔都願意用5%人工換返少一日工,為自己建立多一日休息時間,但現實上香港似乎未有公司咁做。而且,即使公司推出4天工作周,前提係都要達到相同工作量,即係要提高工作效率先行得通。而香港嘅OT文化,亦都難以改變成普遍歐洲公司擁有嘅準時收工文化。換言之,香港短期內應該好難實行到4天工作周,公司肯每個禮拜一日WFH已經好好啦!
再用財務角度計一計,如果單以人工百分比去計,5%其實可多可少,視乎本身人工水平高低。假設人工每月有5萬元,5%即2,500元,押注年回報6%投資組合,投資期為25年,累計金額可高達173萬元!當中仲未計算如果升職加薪後,再扣減5%人工嘅影響,因為人工高咗,「損失」自然更大。
換言之,唔可以睇小付出5%人工嘅機會成本,唔好以為個百分比唔高就有著數!不過,如果能夠利用慳咗嘅日子去進修、做Freelance、嘗試經營生意等,令獲得嘅回報高於人工5%,咁就值得啦!
Follow SICK LEAVE TOMORROW to know more about workplace information!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
Download SICK LEAVE TOMORROW application:
https://sickleavetmr.com/web/download-app/