2023年，由OpenAI開發嘅程式ChatGPT引爆全球AI熱潮，唔少人開始利用AI工具作不同用途。但據Google全球搜尋趨勢顯示，自5月以嚟AI已有降溫跡象，更有外媒引述一份報告指出，開發商OpenAI喺用戶減少及訓練成本高昂下持續虧損，有機會於2024年底前破產。
有報道指，大眾開始自行打造AI聊天機器人，亦有好多公司禁止員工使用ChatGPT工作，但又容許喺工作流程中使用其他由ChatGPT API所開發嘅機械人，導致ChatGPT用戶減少。同時，AI市場競爭加大，例如Meta上個月宣佈夥拍微軟推出首個開源AI模型Llama嘅商業版本Llama 2，並免費提供研究與商業使用。
而且，今年5月曾有報道爆料指， OpenAI因訓練AI模型嘅高昂成本，令去年虧損擴大近一倍至5.4億美元；另有指ChatGPT每日營運成本高達70萬美元（約546萬港元）！OpenAI行政總裁Sam Altman上年亦曾表示，公司及ChatGPT嘅經營成本「令人心痛」。
目前，OpenAI依賴微軟嘅100億美元投資及其他投資者資金作營運，即使已試圖通過GPT-3.5同GPT-4去實現盈利，但至今仍未能達至收支平衡。公司曾預計今年收入將達2億美元，以及2024年可達10億美元，但卻被指太過「理想化」，並預期競爭及虧損只會越嚟越大。
不過，天風國際分析師郭明錤則認為，雖然可能會不利於近期升幅較多嘅概念股，但毋須擔心OpenAI可能破產，因為AI或AIGC已經係明確趨勢，惟行業變化將會創造新嘅贏家與輸家。
