香港人返工放工逼地鐵巴士，又冇得坐，攰到死！廣州就唔同啦，廣州年輕人發掘新潮流，以電動輪椅作為通勤工具，返工、行街、食飯，通通用電動輪椅代步，引致近日廣州街頭湧現大批年輕人坐住電動輪椅穿梭馬路。原來用電動輪椅代步，係為咗避開當地嚴格嘅電動車法規！
最近，廣州推行新法規整治電單車、電動單車，包括限時段行駛、唔可以超速、過斑馬線需要落車手推等，仲會對改裝電動車進行嚴格檢查。當地有唔少年輕人平時習慣用電單車通勤，但推行新法規後，有啲人嘅車冇辦法達到新要求，亦有人認為按照新規定行駛，就會失去佢原本嘅便捷性，所以唯有放棄。
有年輕上班族靈機一觸，將交通工具由電單車改成電動輪椅！佢哋話，出面成日塞車，揸電單車又有好多地方唔畀入，反觀電動輪椅唔需要受交通規則限制，仲可以直接揸入公司，駛埋去自己個位到，超方便。佢哋大讚電動輪椅唔會被限制行駛、唔使泊車位，仲唔使戴頭盔添！
內地媒體引述交通部門回應指，目前納入交通規定管理嘅就只有殘疾人機動輪椅車，呢類車主要以汽油作為燃料，需要進行登記。所以嚴格嚟講，電動輪椅唔屬於交通工具，並唔會按照機動車同非機動車進行管理。內地律師表示此舉唔違法，只係「身體健康嘅人駕駛電動輪椅代步」有道德層面嘅疑慮。
香港打工仔心目中嘅返工模式係咪都係咁呢？每日希望一返工就坐到收工，老細、上司（推行嘅新法規）唔會殺到埋身，咁就最好啦！
