Netflix早前表示為咗吸引更多用戶訂閱，將會推出收費較平嘅廣告版俾用戶選擇。網上有消息指廣告版嘅每月收費將低至4美元（約港幣HK$32），咁低嘅價錢當然有缺點，有興趣嘅用戶要留意以下嘅幾項限制啦。
據最新消息稱，Netflix廣告版將唔俾用户下載影片，即係話唔可以線下觀看。因為有人喺Netflix iOS App入面發現咗一段代碼，指「下載功能開放給所有計劃用戶，廣告版除外」。標準版Netflix plan係允許用戶下載影片並離線觀看，Netflix咁做明顯係想將兩者分開。帶廣告嘅Netflix喺觀看時唔俾跳過廣告，播放廣告時亦無法控制播放功能，不過仍然有啲影片冇廣告。廣告版Netflix預計將於2023年年初推出。
至於訂閱價格會是多少呢？目前仲未有官方消息。目前Netflix基本版（Basic Netflix）定價為每月9.99美元，提供480p影片；標準版（Standard）定價15.49美元，提供1080p影片。最貴嘅版本Premium每月費用為19.99美元，提供4K HDR視影片。廣告版嘅清晰度可能同基本版差唔多。
Netflix推出廣告版服務其中一個原因可能係因為它嘅客戶同營利正在減少。2022年第一季度，Netflix訂閱用戶減少，今次係10年嚟第一次流失，公司認為有好多家庭共享賬戶，加上競爭亦好激烈，就係流失嘅主因。
