我諗各位都實返過啲伏工，伏工特徵有好多，之前有出過啲meme輕輕講過伏工嘅幾個特徵。今次小編會詳細少少，分返工前留意/返工後留意嘅類別，同埋列出多幾個伏工嘅特徵，等大家唔好中伏，想知自己做緊嗰間伏唔伏就快啲睇埋落去啦〜
返工前要留意嘅伏位：
1.法例要求當福利
好多公司冇乜資源，俾唔到好多福利，但係為咗吸引你，會格硬喺招聘廣告打啲偽福利扮係員工福利，例如：供MPF，5.5日工作天、7日annual leave、有薪病假，小編聽過其中一個好癲嘅福利係「會簽合約」，其實員工要清楚了解自己嘅權益福利，唔好以為嗰啲係真福利，俾人恰到上心口。
勞工法例：https://www.labour.gov.hk/tc/legislat/contentA.htm
2.唔等得
有啲招聘廣告會寫明「可以即刻返工就最好」(Immediately Available Preferred)，其實睇到都要小心，如果最後見得成工，但佢想你即刻返，一個月通知都等唔切，咁你就要睇路；又或者，有啲公司急要人，等唔到一個月，但佢肯幫你賠一個月錢都叫做好少少，又急又唔幫手賠就真係伏伏聲！
3.長期做版主
大家每次搵工，可以記低有咩公司請緊人，因為好多伏公司長期都要登廣告請人，咁你就知間公司一定行政上好有問題、一定就好蝦人做，個個做唔長，咁一睇就知伏！
返工後要留意嘅伏位：
4.成日有餅食
依一點同第3點好似，但如果你冇咁多腦細胞記低咩公司成日出現，好唔好彩碌咗入去做，咁你可以觀察下係咪個個星期都有散水餅食，一星期幾次咁多嘅話都幾大鑊，勸你都可以搵定其他工，或者做1/2個月自己感受下都好快會知。
5.OT當食生菜
依個就好睇咩行業，如果係做production/sales嗰啲，長期OT都係正常嘅，始終都冇特定一個時間。如果你做普通office工，唔會話好大workload嘅，咁你就要小心啦，就算你每日OT 個幾鐘，小數怕長計，公司又唔補水其實都幾蝕。當然睇下自己工作能力有冇問題啦，正常的話，一星期OT 1-2日都唔太過份嘅（反正有時都會遲到）。
6.辦公室政治/公司氣氛
如果你去到一間公司，同事之間好少交談，大家都冇乜交流；又或者好多是非/政治問題，某人同某人不和，要好小心講嘢等等，小編諗起都覺得煩，平行返工已經夠辛苦夠攰，仲要煩埋依啲無謂嘢真係不了。
7.同事/上一手嘅暗示
你要接手上一手同事嗰陣，你可以睇下佢有冇留低隱藏訊息俾你，或者一啲暗示依份工好伏嘅消息；現職teammate講嘅話說都可以多加留意，睇下係咪轉達緊俾你知，曾經有網民喺「奴工處」專對發文指前同事留低嘅notes入面叫佢快啲走！
仲有好多伏工特徵其實講唔完，不過就算人哋話伏，都要自己去試過先至知，同埋工都有分夾唔夾，可能人哋覺得差，你做落唔覺差咁都唔洗轉工嘅，去到有一日，你好討厭返依個office，咁你就真係需要轉下工啦〜
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
