經歷咗一段長時間嘅「疫情適應期」,市民無論係生活或工作上嘅安排同習慣都有所轉變。而公司為咗喺逆境中「撐住」同埋提升工作效率,亦需要基於社會現況而制定前瞻性政策!以下簡述咗未來人力資源管理嘅三大趨勢,一齊睇吓你嘅公司有冇貼近「潮流」啦!
趨勢一:在家遠端工作
早前為咗應付疫情,除咗學校需要轉為網上授課外,唔少公司都採取咗「在家工作」呢個工作模式,減少員工對外接觸嘅機會。上司亦不得不改變佢哋監控員工活動嘅方式以保持公司信譽,否則就會好似某大網購平台於2020年實行在家工作指引而惹起員工不滿!而統計數據顯示,在家工作能為員工提供靈活性,有近79%嘅員工表示對公司嘅忠誠度會有所提升。LinkedIn 2022 Talent Insights亦顯示,公司憑靈活性令員工對其感到滿意嘅可能性高2.6倍!
在家工作模式已經唔係疫情嘅專利,唔少公司會喺減薪嘅條件下提供永久在家工作嘅選擇畀員工。而令員工喺決定工作地點、時間及工作模式方面擁有發言權,可有效改善其健康狀況、生產力同流失率,所以在家工作將會係未來嘅一大趨勢。
趨勢二:視員工為重心
唔少企業開始更為意識到員工健康嘅重要性及其對公司成功嘅影響。特別係喺疫情之下,員工可能會出現各種負面情緒,導致心理唔健康。當公司多加關注員工、為佢哋嘅個人生活及工作等各個層面上表示支持嘅時候,就可以令員工保持身心健康,工作效率亦會自然提升。另外,可以透過為員工實施更人性化嘅工作條件去提升員工嘅滿意程度、投入度同忠誠度。
趨勢三:有效利用不同人力資源方案
人力資源管理可以幫助優化薪酬、招聘、績效管理以及員工發展同計劃。而家唔少中小企會利用人力資源技術、系統以保持合規性、有效地計算工時、處理糧單等,幫助公司自動化,同時加強公司營運、改善員工體驗。當公司營運得更加順暢時,公司同員工就有更多時間專注於具有更高價值嘅工作及目標,有助員工穩定性及公司發展。