職場上有人入職、有人離職，來來回回乃正常不過之事。而最近香港經濟不景，有唔少公司需要架構重整、炒人魷魚等，有網民發現平日會一齊食飯嘅同事突然冇再返工，後來先知原來佢一早就畀公司炒咗，但係仲一直返公司「扮工」，驚揭背後陰謀！
有位網民喺Facebook討論區投稿指，早前有位同事喺臨收工時畀上司「補水即炒」，其他同事全不知情。而咁啱上司第二日開始放幾日年假，所以被炒同事可以若無其事繼續返工、同其他人一齊食Lunch傾計等等。
直至上司放年假嘅最後一日，呢位被炒同事實行咗一系列嘅陰毒「復仇計劃」。佢Delete咗幾位同事一齊做嘅Report，又將同事間食飯吹水時講過上司壞話嘅錄音Send畀上司，而佢喺上司放完假返工嗰日開始就冇再出現過。投稿者知道咗呢件事之後十分震驚，一嚟冇諗過公司會咁冇人情味「補水即炒」，二嚟唔明點解可以畀「陌生人」自由出入公司範圍。
有網民留言話，公司「早炒早著」，如果繼續留個咁恐怖嘅人喺到，恐怕會有更嚴重嘅事發生！亦有網民認為，總觀成件事，上司嘅處事手法最有問題！除咗冇處理同關心過被炒同事嘅情緒之外，炒人雖然唔一定要公開原因，但亦應通知所有同事，方便跟進佢手頭上嘅工作，故此認為公司要為今次事件負責。
溫馨提示，刪除公司檔案屬於刑事毀壞，切勿以身試法。而且，「冤有頭，債有主」，小心會連累到其他無辜嘅同事。
上司、HR等要為公司作出重大決定時，應點樣安撫同減輕受影響員工嘅負面情緒？延伸閱讀：公司如何減輕員工的負面情緒？
