臨時僱員、兼職僱員、替工、甚至只得口頭承諾嘅員工又受唔受保障呢？
臨時僱員、兼職僱員或替工受唔受《僱傭條例》所保障？
答案係「受」。無論係臨時僱員、兼職僱員或替工，只要佢地為同一僱主連續工作四星期或以上，而每星期最少工作18小時，就可以被視為「連續性」嘅僱傭合約，受到《僱傭條例》保障，亦俗稱「418員工」。其實喺《僱傭條例》下，並無區分兼職或全職、臨時或長工，只係用連續性合約同非連續性合約區分，只要符合連續性合約嘅要求，就可以受到《僱傭條例》保障。
僱員受聘時，若僱主只以「口頭」講述聘用條款，冇簽訂書面合約，咁呢位僱員受唔受《僱傭條例》保障？
答案係「受」。僱傭合約係指僱主同僱員訂立嘅僱傭協議。僱傭合約可以書面或口頭方式訂立，並可包含明示或暗示嘅條款。但係為咗避免雙方爭拗，都係建議僱主同僱員訂立書面嘅僱傭合約。
僱主可唔可以要求僱員喺簽署僱傭合約時，同意放棄《僱傭條例》下嘅權利同利益？
答案係「唔可以」。僱傭合約嘅任何條款，如有終止或減少《僱傭條例》所賦予僱員嘅權利、利益或保障嘅含意，即屬無效。相反，僱傭合約嘅條款係可以「優於」《僱傭條例》嘅！
僱主抑或僱員都好，都應了解清楚現今香港勞工法例，避免勞資糾紛。想知道更多勞工法例小知識？記得留意Sick Leave Tomorrow定期發放嘅懶人包喇！
