7種職場上最乞人憎特質，你身邊有冇人係咁？

返工除咗睇薪酬Package、工作內容、公司作風之外，同事好唔好都好影響份工返得開唔開心！基本上，唔計「奄尖聲悶」嘅客同高要求嘅上司，同你交流得最多嘅就係一日對足九個鐘嘅同事，同同事夾得埋簡直可以令工作時間加快流逝，做嘢都冇咁辛苦。以下列出咗七種職場上最乞人憎嘅同事特質，你又覺得啱唔啱呢？

1. 淨係識領功卸膊

呢種同事，公司業績好嗰陣就話自己幾有先見之明，功勞有幾大；但當業績差嗰陣，就七情上面話係環境問題、社會問題、銷售部門唔夠努力，仲埋怨其他同事冇幫手，卸膊卸到好似完全唔關自己事咁。

2. 最叻講是非八卦

有人嘅地方就有是非，公司呢啲充滿競爭嘅地方就更加唔使講啦。是非例如係講吓上司有咩難頂嘢、邊個唔妥邊個、同事有咩感情煩惱等等，咩都可以講一餐。呢種同事就最鍾意「交換情報」，用是非拉攏其他人、打好關係，身邊有呢種人嘅你就要小心有一日會受牽連，變成八卦中嘅主角！

3. 懶醒扮大佬

上司一放假，呢種同事就會企出嚟指點江山，提出一啲不設實際嘅提案同見解，希望大家「Buy」佢。假如件事順順利利，佢會話：「一早講咗係咁㗎啦！」；但如果件事唔順利，佢就會話：「我都唔係話咁樣做，你哋唔識！」

4. 咩都Say咗No先

有種同事，無論你問佢乜嘢或者提出合作，都會話：「唔好。」「唔得閒。」。佢淨係想快快脆脆搞掂自己嘅工作，然後收工。其實同事之間互相幫助係基本，始終你都會有要人幫返轉頭嘅一日。

5. 應承咗你又唔做

呢種同事就正正相反，無論你要求啲咩，佢都會話：「Ok，冇問題！」。但當你過咗一排問佢咩進度嘅時候，佢就會話：「未開始，我會做但未有時間住。」。而到Deadline嗰日，佢更會話：「唔好意思，搞唔掂，你都係搵第二個幫手啦！」，到時就真係「過你一棟」喇。

6. 情緒管理失控大師

做嘢大壓力，產生負面情緒，仲發洩喺同事身上？呢種人一遇到唔合心意嘅事就情緒失控，同事出錯，就破口大罵、連珠爆發；自己犯錯，就一哭二鬧話係其他同事「玩針對」。同佢相處辛苦之餘，更令到Office氣氛超尷尬，呢種人都係遠離為妙～

7. 職場政治家

對呢種人嚟講，任何同事都係可利用嘅對象，而且為求目的，不擇手段。例如將其他人嘅Idea包裝成自己嘅想法，刻意討好上司，又喺同事間挑撥離間，務求提升自己嘅地位。

以上種種乞人憎特質，你身邊有冇同事都係咁嘅呢？同乞人憎同事保持距離嘅同時，打工仔都要提防自己變成同類人呀！

冒名頂替症候群：我們都是成功的騙子嗎？