繼「安靜離職」、「大聲離職」後，最近又出現咗新嘅職場趨勢「咖啡打卡」同「懶女孩工作」，都係關於打工仔對工作嘅態度取向。究竟呢兩個新名詞係咩意思？
「咖啡打卡」（Coffee Badging）：唔願意結束在家工作（Work From Home）嘅員工，會為咗滿足公司嘅出勤要求，選擇返公司坐一陣、飲杯咖啡、同同事吹水，歎完咖啡之後就自行返屋企WFH。
Covid-19疫情令WFH呢個工作模式變得普及，直至最近疫情緩和，先開始回復正常。所以越嚟越多科技公司要求員工重回辦公室工作，唔再WFH，而唔願意咁做嘅員工就會「係咁意」返一返公司飲杯嘢、蒲一蒲頭，就好似到此一遊影相打卡咁，然後就返屋企WFH。視訊會議設備公司Owl Labs嘅調查指出，多達58%嘅混合辦公員工承認有「咖啡打卡」行為，另有8%員工表示雖然冇做過，但有意嘗試。
開始咗WFH後，員工好容易會將在家工作同辦公室工作嘅成本作出比較。Owl Labs提到，喺美國，員工喺辦公室工作嘅成本係平均每日51美元，即每個月會用多超過1,000美元；同時每日需要用1小時以上時間通勤。
《華爾街日報》指出，Meta、Google、亞馬遜等科技巨頭都開始透過打卡資料，或者更嚴格嘅手段去確認員工留喺公司嘅時間，唔單止知道員工幾點入Office，仲可以透過監控員工使用印表機、進入其他樓層嘅情況去得知員工有冇喺公司辦公。
「懶女孩工作」（Lazy Girl Job）：一份「錢多、工作少、較為自由」嘅夢幻工作
一份安全、彈性返工放工、可以WFH、冇OT、冇上司監督、有時間發展副業，加上收入唔錯嘅工作，就係「懶女孩工作」。呢種工作狀態，同過去以事業為重、希望升官發財嘅思維大相逕庭；「懶女孩工作」追求嘅係Work-Life Balance，兼顧身心健康嘅發展。
提出呢個前衛思想嘅人，係一位26歲嘅影片創作者Gabrielle Judge，佢解釋呢個趨勢並唔係想人做嘢偷懶，而係形容工作能與生活達到完美平衡，以致於感覺工作就好似喺到偷懶一樣咁舒服。
職場專家Michelle King表示，「懶女孩工作」係員工抵制有毒職場文化嘅體現，同時反映出Z世代嘅工作價值觀係比起成為工作狂、追求事業嘅成功，佢哋更在乎生活品質，而「懶女孩工作」就係實踐嘅方式之一。
你對「咖啡打卡」同「懶女孩工作」呢兩個職場趨勢又有咩睇法呢？
Follow SICK LEAVE TOMORROW to know more about workplace information!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
Download SICK LEAVE TOMORROW application:
https://sickleavetmr.com/web/download-app/
