返工成日偷懶唔做嘢，仲大模廝樣瞓覺，不過依然受老闆器重、仲廣受同事歡迎？菲律賓一名著住黃、黑色背心嘅「貓保安」唔止冇畀人責罵，個個同事都爭住要佢陪返工，仲話因為佢而冇晒工作壓力添！
菲律賓首都馬尼拉嘅環球企業中心（Worldwide Corporate Center）有一位「新入職」嘅保安部同事柯南（Conan），係一隻只有6個月大嘅貓。呢位「貓保安」嘅出現，係因為要接替幾個月前離世嘅前任貓保安。一隻接住一隻，睇嚟呢間公司應該對貓保安嘅「工作能力」好滿意！
柯南負責嘅工作包括坐喺門口「監督」其他同事、陪同事做嘢，同埋為同事解悶！柯南嘅其中一位同事Aljon Aquino話，一冇柯南喺身邊，就冇晒工作動力，仲話柯南可以幫到佢釋放工作壓力！另一位同事Rene Ogardo話，長時間又沉悶嘅保安工作令佢成日都恰眼瞓，同柯南玩可以瞬間精神返晒！當佢執行巡邏工作嘅時候，柯南會喺隔籬陪佢一齊行，佢又會同柯南傾偈，所以唔會覺得孤獨同寂寞。
馬尼拉街頭有數以千計嘅流浪貓，其中唔少貓好好彩可以畀保安人員收養，而大廈嘅上班族又會買食物畀佢哋，大家都好鍾意呢啲貓貓。雖然貓冇狗隻維持治安嘅技能，而且「返工」嘅時候成日瞓覺，但係憑住佢哋可愛嘅樣貌同埋長期嘅陪伴，仍然可以完美地收服一班做足12小時沉悶工作嘅保安人員嘅內心。
Follow SICK LEAVE TOMORROW to know more about workplace information!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
Download SICK LEAVE TOMORROW application:
https://sickleavetmr.com/web/download-app/
