4個職場道歉方法，修補人際關係、建立好上司／好同事形象！

人誰無過，工作中犯錯少不免，而犯錯後道歉係一種敢於承擔責任，同回應錯誤嘅理想方法。無論係上司定同事，都要為自己做嘅事承擔責任，不過道歉唔係一聲「對唔住／Sorry」就算數，應該同時提出修正方案，咁先夠真誠，又令同事、下屬受落㗎嘛！以下4個職場道歉方法，希望幫到你修補同事間嘅人際關係啦！

1. 犯咗小錯：用Email致歉

如果你提供咗錯誤訊息畀下屬／同事、忽略咗重要嘅Email、唔記得批假等，你可以用Email簡單同佢哋講聲唔好意思。

呢啲好似微不足道嘅小錯誤，有啲人習慣唔理、當冇件事，但對下屬嚟講，簡單一聲道歉，會令佢覺得你做事上心，亦帶出你希望事情進行得順利嘅正確態度。呢樣嘢對建立彼此嘅互信有好大幫助，亦係你建立良好個人形象嘅方法。

2. 發現錯誤：即時糾正

有時畀情緒、環境或氣氛影響心情，人好容易唔小心講出令人難受嘅說話。一啲冇心嘅指責、失言，會令團隊造成心病。當意識到自己失言或犯錯後，理應即時暫停、深呼吸，再確認自己嘅錯誤。及後即時承認錯誤、作出糾正，避免問題釀成更大嘅誤會。

道歉後亦唔需要對錯誤嘅詳情多加解釋，咁只會令人覺得你好長氣同婆媽。

3. 當你造成嘅錯誤直接影響到他人：邀請直接交談，當面認錯

如果因為錯過某重要活動、會議，或對某事情抱有不公平嘅批判，因而令某人感到不快或委屈時，應該爭取當面道歉嘅機會。

你可以透過Email，相約下屬一個對談嘅時間，或行經佢個位時通知佢。呢個可以係一個簡短嘅會議，或者係畀對方詳述自己感受嘅會面，咁樣做會令下屬覺得上司願意聆聽，並肯去溝通及解決問題。

4. 於團隊面前犯錯：可於會議上檢討並道歉

如果你曾當眾指責一位同事，但及後發現佢並冇犯錯嘅話，你必須於下次會議時，當住眾人面前還佢一個清白。呢番澄清可以簡潔快速，唔需要太冗長，通常喺會議開始前完成。

如果你認為嗰位同事為人處事低調，可以選擇私下解決，更可以趁呢個機會聽吓佢嘅感受，再度建立信任。

當你願意為自己嘅過失，而喺下屬面前放低身段並真心地認錯，咁樣會令同事及下屬受落，願意同你更坦誠地溝通，亦更添信任！

冒名頂替症候群：我們都是成功的騙子嗎？