好多時喺職場上做出嘅反應,唔一定同工作有關,可能係因為喺環境中受到他人口語、或非口語嘅威脅,繼而衍生壓力。於是為咗保護自己,會採取習慣性嘅方式去應對。
家庭治療師Virginia Satir將呢種情感壓力下嘅表達方式,稱為「生存姿態」。生存姿態冇好同唔好之分,只有「一致」同「不一致」。「一致」即係內心感受到嘅,如實咁表現出嚟;「不一致」則係用一種經過扭曲嘅方式去展現。
職場常見嘅四種壓力應對:
1. 講求公平嘅人:「指責式」壓力應對
你身邊一定有個同事成日埋怨呢樣、埋怨嗰樣:「你話老細係咪有問題呀,連嗰個阿May做嘢亂咁嚟都唔知!」、「擺明就係佢衰啦,做事都唔公平嘅。」
呢種生存姿態為「指責」,為咗生存唔好太煎熬,就會收起對「他人」狀態嘅覺察,將心力關注喺「自己」同周圍「情境」上。造就職場上習慣指責(只見他人做得唔好)嘅你,忽略咗背後其實收埋咗一個害怕失控、孤單,並且好有想法嘅自己。
2. 顧全大局嘅人:「討好式」壓力應對
公司入面總會有個人專係「啃豬頭骨」,次次有大家唔願意做嘅工作,見到老細、同事為難嘅表情,過唔到自己內心嗰關嘅佢就會勉強自己:「唔緊要,我嚟啦。」
呢種生存姿態為「討好」,習慣忽略「自己」嘅感受,以「他人」同周圍「情境」為主體。他人好或不好、事情完唔完成到,彷彿都係佢嘅責任。「吃力不討好」之餘,然而因為焦點放喺他人身上,幾乎唔知道其實自己亦陷入夾雜憂慮、焦慮嘅心情。
3. 以事論事嘅人:「超理智式」壓力應對
思路清晰、任何問題都可以好快搵到重點、針對回應,就係超理智人士。先討論事情同規則,壓抑感性、訴諸理性,為咗解決問題,可以委屈他人甚至自己。
呢種生存姿態為「超理智」,唔去感受「自己」同「他人」嘅心情,只關注問題「情境」。喺職場上,人哋可能話咁樣係缺乏「同理心」,但自己明白,呢種強悍背後隱藏住一種不為人知嘅恐懼社交心情。
4. 關鍵時刻搞笑嘅人:「打斷式」壓力應對
每次工作氣氛唔好嘅時候,有呢位同事喺到搞吓笑就冇事?外表輕鬆,其實內心焦慮,睇起嚟自發性嘅幽默,其實係為咗迴避感受自己、他人及情境。
呢種生存姿態為「打斷式」,呢種人其實活得最辛苦,因為佢哋嘅「搞笑」係一種心理上混亂、缺乏控制感嘅行為反應。一個從小習慣「打斷人」嘅人,可能變成職場上嘅緩衝劑或開心果,然而,心入面卻經常缺乏歸屬感,有千百個不自在同無奈。
唔可以活得內外一致嘅人,喺職場上往往過得最辛苦。不如搵時間靜落嚟諗諗,其實自己害怕緊嘅係咩?然後,決定自己喺未來,要用咩姿態繼續生存落去。
Follow SICK LEAVE TOMORROW to know more about workplace information!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
Download SICK LEAVE TOMORROW application:
https://sickleavetmr.com/web/download-app/