上星期蘇拉襲港,打工仔多咗日「風假」可以喺屋企休息吓,提早完結忙碌嘅一周。不過,有唔少公司臨時採用「在家工作」模式,員工要喺屋企如常工作。由此可見,疫情後,WFH變得越嚟越普及,更有公司考慮每星期WFH一至兩日,以減少開支。看似慳車錢、慳時間、增加Work-Life Balance嘅WFH,點解會畀網民「唾罵」,仲話家中工作慘變「加鐘工作」?即睇WFH五大壞處!
1. 返工放工時間亂晒大龍
以前返Office做嘢,Office Hour 9:30-6:30,頂多做到7點就收工,返到屋企可以完全放低工作好好休息。而家WFH令屋企都變成工作嘅地方,每日OT一兩個鐘之餘,就算到瞓教嗰刻,感覺都冇真正離開過工作,令睡眠質素亦隨之變差!
2. 同事之間欠缺溝通
喺Office,有咩疑問都可以直接行去同事個位到面對面傾。WFH令同事間即時溝通嘅機會少咗,彼此亦只會用Email或WhatsApp溝通。而每人解讀訊息嘅方式都有唔同,好容易因為溝通問題而影響到工作,間接令完成工作嘅所需時間增長。
3. 設備問題
WFH期間,同事都係用自己電腦連接公司System,但並唔係每個同事都連到公司VPN,連唔到嘅同事就要用「虛擬機器主控台」(Remote Virtual Machine)嚟做嘢。但呢個系統會不時出現Delay,甚至每10分鐘就要重新連接,令工作進度大受影響!
4. WFH好似坐緊監
網民話自己本來就唔多做運動,平時都係靠返工放工條路令自己有機會郁動一下。而家WFH就好似坐監咁,日日都係喺同一個空間入面,走動少之餘,仲令心理壓力增加。
5. 身體狀況受影響
WFH嘅日子越長,呢位網民嘅精神狀態就越差。佢屋企冇合適嘅辦公室設備,例如辦公枱、凳等,令佢身體狀況受影響,例如頸部疼痛加劇,損害個人健康。
你又認為WFH係咪弊多於利呢?