BlackBerry早前公佈咗一份研究報告,指全球75%企業正考慮或已經禁止喺工作場所使用ChatGPT等生成式人工智能(AI)。當中更有61%企業表示呢個禁令會係長期或永久性,主要原因係出於對數據安全、私隱及企業聲譽嘅風險考慮。
雖然大多數企業考慮禁止喺工作場所應用生成式AI,但係佢哋普遍都認為AI有助提高工作效率(55%)、創新(52%)及增強創造力(51%)。另外仲有81%受訪者贊成用AI工具進行網絡安全防禦,希望有助打撃網絡犯罪分子。
BlackBerry網絡安全首席技術官Shishir Singh認為,企業對於喺工作場所應用生成式AI,應該採用謹慎而靈活嘅態度。佢話:「呢個禁令可能意味住大量嘅潛在商業利益被扼殺。隨住平台嘅成熟同法規嘅實施,企業政策中可能會引入一定嘅靈活性,關鍵在於有冇使用適當嘅工具去監控同管理AI應用。」
Gartner日前公佈嘅2023年Q2調查報告指,生成式AI已經成為第二大最常被提及嘅風險。生成式AI(如OpenAI嘅ChatGPT同Google Bard)嘅大規模可用性成為咗2023年第二季度企業風險管理人員最關注嘅問題。
企業要實施禁令,唔畀員工使用生成式AI嘅主要原因係擔心ChatGPT帶嚟嘅風險問題。不過,禁令只係選擇對問題視而不見,如果真正想解決問題嘅話,就要學識為員工制定使用指南!
延伸閱讀:搵CHATGPT幫手做嘢小心犯法!有「優」亦有「憂」! 公司如何制定使用指南