每個月人工得嗰雞碎咁多，仲要儲錢去旅行、買樓，點夠使呀？香港打工仔除咗食杯麵慳錢之外，仲可以參考吓內地嘅最新慳錢趨勢——食「白人飯」(Bland Food）！繼「剩菜盲盒」後，內地最近開始興起食「白人飯」，即西方白人平時食嘅簡單菜式，慳錢之餘仲可以提高工作效率？
「白人飯」即係主張「不開火、不切菜、不洗碗」嘅溫和飲食，例如冇調味嘅沙律、麵包等。據CNN報導，同「白人飯」相關嘅話題早喺上年10月就已經喺網上出現，直至今年5月先廣泛流傳。最初係有內地網民分享外國同事或伴侶嘅Lunch，當中只有穀物、白烚雞胸肉、蘿蔔沙律、火腿蛋，甚至係白麵包等，仲話「白人真係咩都食得落肚」、「呢類食物同『飼料』有咩分別」。話題瞬間引起網民熱烈討論，唔少人表示自己嘅「中國胃」接受唔到呢種冇煮過、冇味、但求飽肚嘅食物，分分鐘搞到食慾不振！
有網民指，西方白人之所以能忍受咁「枯燥」嘅Lunch，係因為中西兩地打工文化唔同。西方工時較短，有更多時間享受生活，多數企業甚至唔限制返、放工時間，打工仔可以一早收工去食好嘢；相反，內地工時較長，甚至一個星期要返足6日，所以打工仔唯有藉一餐豐富嘅Lunch為忙碌嘅工作尋找心靈慰籍，咁先可以應付長時間嘅工作。
不過，隨住越嚟越多人分享身邊外國友人嘅「白人飯」，內地打工仔逐漸開始仿效呢種飲食文化，甚至研製出偏中式嘅「白人飯」，例如相對簡單及成本低嘅包、麵等午餐。隨之發現準備方法簡單、價錢平、可以縮短用餐時間，亦唔會因為食太飽而瞌眼瞓，反而更有精神處理工作業務，從而提高工作效率，非常適合打工仔！
「白人飯」喺內地流行一事好快就傳到外國嘅Reddit網上討論區。有網民分析，其實喺某程度上反映咗內地打工仔嘅工作文化問題，如工時長、工作量大、職場節奏急速等，導致冇辦法喺Lunch Time好好用餐，咁先會令簡單、慳錢、慳時間嘅「白人飯」變得流行。
Follow SICK LEAVE TOMORROW to know more about workplace information!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
Download SICK LEAVE TOMORROW application:
https://sickleavetmr.com/web/download-app/
