加拿大有港式糖水舖登招聘廣告,寫明唔歡迎暑期工同埋計劃以Stream B移民嘅香港人嚟應徵,疑似帶有歧視成分,惹嚟網民怒轟!事件火速升溫,店方後來喺Facebook道歉及解僱涉事女經理,而該位女經理則喺Facebook開Live解釋事件並帶淚道歉,惟難以平息是次風波。
7月11日,加拿大宣布擴大香港人「救生艇計劃」修正細節,取消Stream B嘅學歷限制。只要成功喺加拿大工作滿一年即可申請永居身份,8月15日起生效,有唔少港人對計劃大感興趣。
而幾日前,多倫多北約克一間港式糖水舖「糖記甜品」以簡體字於網上登招聘廣告,廣告最下方註明「香港來的新移民Stream B或者暑假工,請勿擾,謝謝」,疑似歧視欲根據「救生艇」計劃移民當地嘅港人。店方後來喺Facebook道歉及解僱涉事女經理以平息事件,而該女經理更喺Facebook開Live,聲淚俱下解釋事件,強調唔係有心歧視他人,而老闆亦唔知情,事後感到非常內疚。
7月25日朝早,「糖記甜品」再於Facebook發出道歉聲明,再一次向公眾誠懇道歉同表明涉事分店經理已被即時解僱。更表示公司「大部分人曾經(現在)都是這個地方的『新移民』」,已深刻理解「職場平等」嘅重要性,確保日後營造一個公平、平等同充滿尊重嘅工作環境。
任何職場上嘅不恰當行為,例如歧視、欺凌、性騷擾等,都係「不可一.不可再」!如果打工仔懷疑自己或他人遇上不合理對待,記得及早向相關機構求助。
延伸閱讀 —— 已婚人母就唔應該出嚟返工? https://rb.gy/4tt19