眼見未為真！內地有人喺網上平台利用AI技術進行換面，扮成俄羅斯士兵直播帶貨賺錢，最後被網民揭穿，遭永久封鎖帳號。
近月於中國抖音平台上，出現一位俄羅斯士兵「保爾．柯察鐵」，聲稱自己正喺俄烏前線英勇作戰，仲提及「活捉美軍」、「繳獲美國坦克槍支」等話題，吸引咗逾40萬名粉絲追蹤，仲有大量網民留言大讚兼舉手指公表示支持。佢仲順勢喺自家網店大賣俄羅斯特產，賺一大筆。
不過，早就有網民質疑片段嘅真實性，繼而揭穿佢真正身份原來係一名河南男子，利用人工智能（AI）換面技術直播賺錢。網民發現除咗佢個樣「太假」、講嘢帶有河南口音、IP地址寫河南之外，片段入面曾經出現嘅「烏克蘭核電站」實際仲係河南洛陽發電廠！呢名「俄羅斯士兵」被揭穿身份之後，試圖改名做「王抗美」，為自己開一個新人設繼續佢嘅網紅事業，但最後轉型宣告失敗。
抖音亦已發聲明指出，「保爾．柯察鐵」仿冒俄羅斯軍人博取流量，因此已無限期封鎖其帳號。
