每日都開大大細細嘅會議,開到頭都暈,仲反而冇時間做原本嘅工作!開會除咗會佔據員工工作嘅時間外,其實「非必要會議」仲會消耗公司大量成本!Shopify推出新功能,計出公司嘅「會議成本」,開會30分鐘或等於花費逾1萬元!
加拿大電子商務公司Shopify近日喺Google日曆加入一項擴充功能——「會議成本計算機」,將每次嘅會議成本化為貨幣形式嚟衡量。營運總監Kaz Nejatian表示,呢項功能旨在令員工明白「時間就係金錢」,藉此提醒員工時間嘅價值並提高生產力,減少開「非必要會議」。
「會議成本計算機」根據員工嘅平均薪酬、與會者人數同會議時長嘅數據去計算,令員工可以睇到會議嘅「實際花費」。以一個三人嘅30分鐘會議為例,平均成本達700至1,600美元(約5,460至12,480港元);如果有一名高級員工參與,成本甚至超過2,000美元(約15,600港元)!Shopify估計,只要取消每人每周三次嘅會議,整體成本將會減少15%!
事實上,Shopify早喺年頭已發起一個名為「Chaos Monkey」嘅改革,包括取消所有三人以上嘅會議、逢周三強制唔開會,以及刪除非必要嘅Slack通訊軟件群組。據了解,自改革以嚟已成功取消超過1.2萬項原本編排喺日曆上嘅活動,當中大部分為重覆會議,成功為員工騰出逾32.2萬小時嚟完成工作。