唔少市場調查都指出,全球各地資訊科技界人才短缺,出極Offer都冇人Accept,有職位冇人返工。加上而家AI盛行,各大科技公司都希望可以招募或留住頂尖科技人才,有公司仲出超高人工,想搵到「對的人」。研發ChatGPT嘅公司OpenAI出招聘廣告請軟件工程師,薪酬最高竟達137萬美元(約1,073萬港元)!
外國薪資網站Levels.fyi日前統計咗2022年嘅OpenAI員工正式錄取信件資料,揭露OpenAI員工嘅薪酬情況!原來而家OpenAI嘅軟件工程師年薪中位數,達約724萬港元!當中包含約234萬港元嘅基本工資,以及約489萬港元嘅OpenAI股票獎勵。
除咗OpenAI,各大科企巨頭亦願意向科技人才提供高薪條件。例如蘋果(Apple)嘅高級軟件工程師平均年薪約256.8萬港元,初級軟件工程師亦達約127萬港元。根據另一薪資網站glassdoor顯示,Meta嘅VR遊戲軟件工程師人工亦介乎約135.5萬至188萬港元,實在非常可觀。
至於香港嘅科技人才,目前亦同樣面臨巨大難題!根據IT獵頭公司Venturenix公布嘅《2022年度本港薪酬指南》,近年嘅移民潮令至少1萬至1.5萬名本地IT專才流失,更預計未來5年將高達10萬名。
然而,目前香港每年只有約1,500名相關學科嘅畢業生,供不應求情況嚴重。所以大多企業均接受工程師喺同一間公司工作1至2年就轉工,即使工作經驗較淺,仍可獲10至20%人工增幅,一啲熱門工種或年資較深嘅人才,增幅甚至可達30%。