除咗「安靜離職」（Quiet Quitting）、「安靜招聘」（Quiet Hiring）同「大離職潮」（Great Resignation）外，今年員工之間出現咗一股新風氣，就係「大聲離職」（Loud Quitting）。又出現多一個同打工仔相關嘅職場用語，究竟「大聲離職」係咩意思呢？
「大聲離職」其實同「安靜離職」有一半意思係相同嘅，「安靜離職」係指員工只會做工作嘅最低要求，唔會投放「非絕對必要」嘅時間、精力或熱情。不過，呢類員工並唔會「離職」，而係照返工照出糧，所以唔好畀個字面意思誤導呀！而「大聲離職」亦係指員工只以最低限度嘅效率工作，不過唔同嘅係，佢哋同時會大聲、公開咁談論自己搵新工嘅事，希望老細會以升職或加人工嘅誘因挽留自己。
全球績效管理咨詢公司Gallup最近發表咗一份《2023年全球工作場所狀況報告》（State of the Global Workplace 2023），向來自全球超過12萬名15歲或以上嘅就業人士進行調查，發現有18%受訪者曾以「大聲離職」方式表達自己對工作嘅不滿，而實行「安靜離職」嘅打工仔則有59%。
「大聲離職」嘅員工各有原因，可能覺得職位配唔起自己，亦有可能係對僱主失去咗信任。報告主要作者兼Gallup首席職場科學家Jim Harter表示，出現「大聲離職」或「安靜離職」，主要原因係同僱主嘅管理方式有關。
Jim指，僱主與員工嘅關係變得越嚟越疏離，例如員工感受唔到僱主願意支援佢嘅工作，員工對工作嘅投入程度自然下降，另謀高就嘅意欲就會更強烈。尤其係「大聲離職」嘅員工，可能會影響公司達成發展目標，並減低新人加入公司嘅意欲，影響甚大。
Gallup建議僱主要辨識敬業同唔敬業嘅員工，並同員工進行定期對話，可以對佢哋嘅表現作出反饋、認可員工嘅工作表現、同佢哋討論目標及優先處理事項等。Jim認為只要僱主處理得宜，或能夠改變管理嘅方式，可為職場帶嚟新氣象。
