香港無線科技商會嘅最新調查結果顯示，有73%受訪香港企業打算於業務中採用人工智能（AI），不過當中有94%認為AI只可以喺應用程式開發工作中擔當支援角色。同時，受訪港企認為人才及技術荒將阻礙AI於香港應用程式行業嘅進一步普及。
香港無線科技商會第8次主辦嘅「香港智能手機應用程式業界調查2022-2023」，係主要就香港智能手機應用程式業界發展而進行嘅問卷調查。調查於今年2月至4月期間，分別以網上問卷及電話形式成功訪問咗172間喺香港或亞洲其他地區經營智能手機應用程式業務嘅企管理階層。結果發現，73%受訪港企表示將採用AI產品或服務，當中94%認為AI可以喺應用程式開發過程中擔任支援角色，認為能夠提升1%至24%生產力。69%指AI可以提升質素同效率、減少人手出錯同慳成本等。不過，由於AI需要人手去管理及支援、舊團隊未必及時適應及技術仲未成熟等，所以有33%受訪港企表示會因應AI而增聘人手，其中11%更指會增加25%或以上人手！然而，53%受訪者指公司缺乏所需技術、資源同時間，導致AI暫時未能普及。
另外，調查發現有47%受訪者話技術人員唔夠，短缺情況比管理層及銷售人員較為嚴重！整體嚟講，有59%認為技術人員唔夠嘅主因係，香港缺乏擁有相關技術嘅專才。至於管理層及銷售人員嘅人才短缺情況，受訪者認為情況有所改善。面對人才流失及短缺問題，59%受訪港企指透過招聘兼職、自由工作者；45%則指透過改善員工福利待遇去解決。
生產力局數碼轉型部總經理陳仲文表示：「人才荒仍然係企業要面對嘅主要問題，業界除咗可以考慮用更彈性嘅聘用方式，或提升福利待遇吸引人才之外，亦可為現有員工提供合適技能培訓，例如AI，以提高工作效率、維持企業競爭力。企業亦唔應該視AI為資訊科技或程式開發部門專用，而要考慮點樣喺各部門中部署應用。」
僱主想搵資訊科技技術人員？入嚟我哋Sick Leave Tomorrow，呢個專為IT人而設嘅求職平台咪得囉！
