除咗我哋早前一篇關於「工傷權益」嘅文章提及過：原來工傷可以索償「喪失生活情趣的補償」（延伸閱讀：https://shorturl.at/jATY3）之外，其實畀人無理解僱都可以索償「情感賠償」㗎！即睇以下案例：
一名男侍應鍾先生於2021年5月9日經朋友介紹，決定辭去本來穩定嘅工作，轉去一間名叫「魚翅大排檔」嘅酒樓到做樓面。點知入職後唔夠2個星期，即5月20日，佢不幸患上左下肢蜂窩性組織炎。佢經朋友通知咗僱主之後，就去咗伊利沙伯醫院求診，醫生仲批咗4日病假畀佢。然後，鍾先生就即刻將病假紙WhatsApp Send畀僱主。第二日，鍾先生透過朋友口中得知，佢嘅職位暫時有人頂上，僱主亦叫佢隻腳好返先好返工。到呢一刻，鍾先生做足晒請病假程序，而僱主亦搵咗人暫時頂替佢，照計對公司冇咩影響，應該相安無事吖？但係……
鍾先生於同月27日通知經理可以兩日後復工，但經理表示擔心佢會再次腳痛，所以已經請咗其他人代替佢嘅職位，即係炒佢魷魚！鍾先生後來憶述：「當時疫情緊畀人炒咗，我都好徬徨。我哋呢啲草根，手停口停㗎嘛！」，佢唯有向平機會提出申訴，但雙方調解不果，最後由平機會代表鍾先生入稟索償。
平機會於2022年11月16日代表鍾先生入稟區院，指控前僱主干犯《殘疾歧視條例》，要求酒樓書面道歉，並就佢嘅「情感損失」賠償6萬蚊以及訟費等。2023年1月31日，法官陳錦泉於區域法院進行裁決，表示已確認答辯方收到申索通知書同出庭通知，但仍冇代表出庭或存檔文件回應，因而判答辯方敗訴。
陳官認為，雖然僱主於試用期間炒人可以唔使交代理由，但係亦唔容許歧視令僱員受到「不平等待遇」，所以試用期並唔係特別抗辯因素，最終下令酒樓須向鍾先生賠償2萬蚊「情感賠償」，兼付訟費。
Follow SICK LEAVE TOMORROW to know more about workplace information!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
Download SICK LEAVE TOMORROW application:
https://sickleavetmr.com/web/download-app/
