「工傷？唔關我事啦，我又唔係做建造業！」講起工傷，打工仔普遍都認為建造業界先係高危場所，冇諗過其實工傷距離自己一啲都唔遠！近日有關塌物事故嘅新聞屢現，包括公立醫院石屎剝落、跌假天花等，不禁令人擔心！意外係意料之外，如果打工仔不幸遇上工傷，又應該點做？
常見誤解 ➊
好多人以為工傷只可以追返醫藥費同缺勤薪金，好似同普通病假冇分別咁，完全唔知道自己實際擁有嘅權益！
其實仲有好多可以索償嘅項目，例如有「痛楚及痛苦賠償」、「喪失生活情趣的補償」、「收入損失」、「未來收入損失」、「未來醫療支出」同埋「接受治療所引致的交通開支」等。如因工受傷，可就索償項目向專業人士尋求協助。
常見誤解 ➋
唔好以為唔關僱主事，就冇得Claim工傷！畀同事整傷，其實都可以進行索償程序㗎！
法例規定如果僱員工作時受傷，係因為僱主或其他同事嘅疏忽而造成，僱主就要負上法律責任。法律上，僱主係有責任確保僱員喺安全嘅工作環境中工作。如果僱主提供質素差劣嘅工具畀僱員使用，從而導致傷亡，又或者僱主喺未有提供安全工作環境嘅情況下，引致僱員受傷，亦屬於疏忽，僱員可向僱主提出「疏忽索償」。
若不幸因工受傷，員工可按照以下4個步驟去做：
步驟 ➊ 立即通知公司
發生任何工傷，都應該立即通知公司，一般係通知上司或HR，細公司可以直接通知老闆。如果受咗傷，過幾日先通知公司，可能會畀公司質疑點解當時唔即刻通報，有機會懷疑你係「呃工傷」。另外，除非係十萬火急，否則一律建議用Email或寫信留低證明，以保障自己。
步驟 ➋ 儘快睇醫生
所有工傷都一定要有醫生證明書（俗稱：醫生紙）。通知公司後，需儘快睇醫生，並向醫生講清楚受傷原因及經過，令醫生可以準確判斷同評估你嘅受傷係咪因為工作而導致。而且，一定要向醫生拎醫生報告，報告係證明工傷嘅有力證據。同時要檢查醫生報告中，有冇註明「工傷」，如果冇寫，日後可能無法獲得賠償。記得要請病假嘅話，要叫醫生出「病假紙」，而唔係「到診紙」，只有「病假紙」先可以獲得病假賠償。
步驟 ➌ 呈報勞工處
法例規定，公司要喺工傷個案發生後14日內呈報；死亡個案則要喺7日內呈報。至於打工仔要做嘅，就係向老闆或HR確認公司係咪已經向勞工處呈報工傷個案。勞工處收到呈報後，會向受傷嘅打工仔寄出「工傷病假跟進通知書」。假如一個月內仲未收到，記得向勞工處查詢！
步驟 ➍ 跟進手續
按照「工傷病假跟進通知書」指引，到勞工處登記及辦妥有關手續同程序。同時，向公司提交相關醫生報告、收據同病假紙等。記得記得記得一定要將所有相關文件妥善保管，最好就影印備份，以備不時之需。
如有需要就工傷事宜了解更多或追討索償，小編建議僱員可以搵坊間嘅法律機構幫手。《僱員補償條例》（香港法例第282章）第14(1)條：因工受傷的訴訟，則必須於導致僱員受傷的意外發生日期起計的兩年內，向法院提出訴訟。
Follow SICK LEAVE TOMORROW to know more about workplace information!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
Download SICK LEAVE TOMORROW application:
https://sickleavetmr.com/web/download-app/
