「Blue Monday」從來都係所有打工仔嘅惡夢,全日都會心情麻麻!不過,台灣未來將有機會「週休三日」,每星期只係返四日工,同「Blue Monday」講拜拜?台灣有民眾喺網上平台發起聯署,要台灣成為亞洲第一個「週休三日」嘅地方,目前有超過5,700人和議,當地政府將會喺6月26日前回應。
台灣一名網友喺公共政策網路參與平台,發起咗一項提案:要台灣成為亞洲第一個「週休三日」嘅地方。佢指出,歐美國家已經有部分企業嘗試推行「週休3日」,希望台灣可以借鑒。根據英國先前公布嘅試驗結果,總共有61間企業2,900名員工參與。試驗期間同往年同期相比,公司平均收益增加咗35%、員工離職率都減少咗57%。而參與試驗嘅公司有高達92%願意繼續實施「週休三日」。
呢位網友亦強調,2021年公布嘅台灣平均年總工時統計,雖然已經降至2,000小時,創下歷年最低紀錄,但仍然係全球第四高。如果「週休三日」,唔單止可以提升工作效率、降低員工離職率,對員工嚟講放多日假可以多啲「Family Time」同「Me Time」,個人心理質素都提升埋!
不過,台灣勞動基準法規定,員工每日工作時間唔可以超過8小時。而且,開OT嘅話,僱主要畀OT錢。所以有網民認為如果要實行「週休三日」,會導致每日嘅工時增加,僱主仲要額外再畀OT錢,根本係多此一舉!佢哋認為台灣勞動環境唔適合咁做,反而最大問題係「縮短工時」、減少OT,而唔係「放多日假」。
雖然香港冇規定員工每日工作時間,但係根據香港法例第57章《僱傭條例》,「凡按連續性合約受僱的僱員,每7天可享有1天休息日。除了因機器或工廠設備發生故障或任何緊急事故,否則僱主不可要求僱員在休息日工作。在這些例外情況下,僱主必須另定休息日。另定休息日須安排在原定休息日後的30天之內。 」大家要注意啦!
香港 = 最過度勞累城市
目前,香港喺唔少報告中嘅一項「最過度勞累城市」(Top Overworked Cities in the Ranking),都「屢獲」全球第一名!香港嘅打工仔,又想唔想「週休三日」呢?小編身邊嘅朋友一致認為,唔OT已經係皇恩浩蕩!一星期放三日假?諗吓好喇!
Follow「Sick Leave Tomorrow」,即刻收到職場新資訊!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
我哋啱啱出咗手機App呀,方便各位IT人搵工~快啲撳下面條Link Download啦!
https://sickleavetmr.com/web/download-app/