WhatsApp最近成日更新，繼早前8月更新咗3項功能之後，最近有外國媒體報導WhatsApp將會有多6大功能，雖然官方仲未正式宣佈同寫入WhatsApp Blog，但應該好快就會有消息通知！我哋劇透睇下有咩新功能先，有啲功能小編都覺得幾有用～
新功能（1）群組投票功能
WhatsApp群組管理員可以喺群組入面發起投票，設定問題同唔同答案俾成員選擇，投票結果同票數會即時顯示喺選項之中。現時功能只喺一部份測試版（Beta）用戶中開放，之後先會全面推出。
新功能（2）取消刪除「在我的手機上刪除」嘅訊息
原有WhatsApp係俾用戶喺發出訊息嘅一小時內反悔，刪除已傳送俾對方嘅訊息，亦都可以選擇淨係刪除自己手機上訊息。相信大家都試過，如果想刪除雙方手機上嘅訊息，又唔小心撳錯咗「在我的手機上刪除」，就會無辦法再撳「在所有人的手機上刪除」。為咗避免依種情況，WhatsApp新加入「還原」功能，俾用戶喺刪除訊息後嘅幾秒之內將已刪除嘅訊息「還原」返嚟。
新功能（3）視像通話邀請連結
WhatsApp將新增「語音通話連結」功能，用戶可以建立視像通話邀請連結，邀請聯絡人點擊連結以加入通話，類似ZOOM嘅操作模式。
新功能（4）管理員刪除
WhatsApp群組嘅管理員而家可以隨時將群組內嘅任意訊息完全刪除，方法一樣係長撳訊息後點擊「在所有人的手機上刪除」，所有人都會見到該訊息變成「管理員已刪除此訊息」，避免錯誤或過時嘅資訊。
新功能（5）搜尋未讀訊息
WhatsApp最近喺搜尋功能中，加入「未讀」一欄，方便用戶將所有標示為未讀嘅訊息同聊天室一次過篩出嚟，又可以喺「未讀」中搜尋特定字眼，咁樣就只會顯示喺未讀訊息中含有相關字眼嘅訊息。
WhatsApp新功能（6）退出群組不通知其他人
想退群嗰陣又唔想俾人知咁尷尬。而家，無論係群組成員主動離開定被管理員踢走，其他群組成員都唔會再收到通知，得管理員會知道有人退群。
資料來源：CWABETHINFO、newsazi
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
