返工的確好辛苦，學子華神話齋「鍾意返工嘅人一定係鬼上身！」，冇人會鍾意返工，但可以令你每日都撐住頂硬上返工，除咗錢之外，仲有好多其他因素。如果你返緊嘅工，中咗以下4個觸發你辭職嘅理由，咁你真係好唔好彩啦，認真諗下今晚係咪要食住月餅搵工…
好多時我哋喺職場上總會遇到好多唔如意嘅事，可能係面對永無止境嘅工作、俾上司客人狂鬧/欺負、工作壓力好大、公司環境氣氛好差等，令我哋有時都會有辭職嘅念頭，但係永遠真係做決定嗰刻，就會猶豫不決，嚟一場天使魔鬼嘅對決。到底係公司唔啱自己定係自己未適應？抑或只係自己抗壓能力低？隨便轉公司，好驚下一間公司更難適應。如果你成日苦惱到底應該去定留，或者可以睇吓以下依幾個你應該離職嘅訊號。
1.人工低、時間長
大家搵工當然向錢向啦，如果你喺同一間公司做嘢幾年，人工都冇加過，又或者加得3%咁少，咁大家就真係可以同同事講定拜拜。如果錢途ok嘅話就要諗下時間，講緊嘅唔止係返工車程遠咁簡單，如果來回要3小時嗰啲就真係可以搵多幾個選擇揀下，事關假設每日返8小時，都變咗11小時，冇咗差唔多半日，仲未計塞車。第二就係OT/工時啦，如果你份工係較長時間/要OT好耐嘅話，首先要睇下有冇補水，冇嘅就要計下人工差異補唔補得返嗰啲時間，計返可能仲低人工過原本。仲有你對生活嘅追求，如果你好需要休息時間/Me Time嘅，你諗下你份工可唔可以滿足到你work-life balnce，定係收工都冇時間約朋友食個飯，甚至冇時間俾你去進修學多門手藝。如果情況真係去到咁差，仲有咩原因值得繼續做落去？
2.影響身體、情緒
如果返工長期都好大壓力，覺得自己點做都唔好，但你又唔係新入職，咁就要留意下自己到底係咪啱做依份工。如果上司/客人成日都發洩情緒喺你身上，搞到你好唔開心，收工都仲不停諗。又或者每日返到公司都覺得好痛苦，好想即刻離開個位走人，完全冇動力甚至唔想面對工作，咁其實真係去到一個臨界點，再加上假如你身體健康都因為份工而變差，抵抗力弱咗搞到成日病，你需要休息一下或者轉其他工作環境。
3.冇成就感、價值
如果你份工做嘅嘢開始令你好厭惡，完成/做得好嘅時候，一啲成功感都冇，你每日好似行屍走肉咁返工，睇唔到有咩前景/發展可言；你做嘅嘢幫唔到你增長知識/技能，你要諗下繼續做對你仲有冇價值，除非你唔求升職，只求安穩工作。
4.工作環境唔友善
到咗最後一個訊號，好多人離職嘅原因，就是因為「工作環境唔友善」，雖然大家都係打份工，但係職場中往往就係好多辦公室政治，同事之間勾心鬥角、爾虞我詐等嘅攻心計。有時你只係想普通做自己份內事，但永遠都會燒埋你嗰疊，搞到職場環境好惡劣，少啲腦力都隨時會死咁，真係好鬼煩。就算好彩冇依啲心計，都可能係啲同事難相處，冇辦法同佢哋一齊共事，工作能力低到拖累你等，通通都令你每日處於一個好困擾嘅狀況下工作，做事嘅效率都大大降低。
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
