第一印象好緊要，隨時會影響埋你份人工？芝加哥大學一項研究顯示，愈識打扮嘅打工仔人工就愈高，如果衣著打扮得體，人工平均高20%。不論係男係女，外表儀容喺職場都十分重要，如果想俾好印象人哋，可以參考研究結果，著依一類嘅衫。

打扮得體人工高20%

芝加哥大學嘅一項研究收集咗14,600位男性與女性受訪者嘅數據，追蹤佢哋畢業後13年嘅職涯生活。結果發現，外觀係會影響年收入，愈識得打扮嘅人薪金愈高，會打扮嘅人比起唔會打扮嘅人，人工平均高20%。通常有吸引力嘅人喺生活上都有好多優勢，例如喺職場上有吸引力嘅人往往較容易受聘，或更有可能獲得晉升機會。

研究人員解釋，人普遍喺潛意識中會對一個人有偏見，依種現象可以稱為暈輪效應（halo effect），亦即係話，當一個人外表討好，其他人會潛意識覺得佢有其他良好嘅人格特徽，如認為佢哋更聰明、更加做得嘢，導致有吸引力嘅人獲得更多嘅發展機會。

研究團隊又按性別細分數據，調查女性與男性嘅外觀同薪酬嘅關係係咪相同。結果顯示，外表儀容喺職場對男女都十分重要，尤其係女性要特別注意自己嘅外觀。 平均外表較平凡但打扮得體嘅女性，比起外表討好，但唔識打扮嘅女性獲得更多收入。研究人員解釋，「美」對女性嚟講並唔係完全取決於先天因素，更重要嘅係你嘅行為，女性可以結合自己嘅人格特質同整潔打扮嚟展現自己嘅專業形象。

衣著打扮會影響事業

英國赫特福德郡大學另一項研究顯示，女性嘅衣著打扮可能影響自己嘅事業可唔可以成功。研究團隊搵咗300名受訪者，並要求佢哋望8位穿著長褲套裝/裙裝嘅女性嘅相，2款服裝嘅顏色均為深藍色且質料一樣，同時面部特徵經過模糊處理，受訪者就「自信、成就、可靠、薪酬、靈活性」5個方面為8位女性進行評分，最後發現身穿裙子嘅女性獲得較高分數。

論文作者，英國赫特福德郡大學教授Karen Pine表示：「我哋會根據其他人嘅衣著並喺見面嘅頭幾秒中判斷一個人嘅專業。」一般嚟講，穿著較男性化嘅女性通常會被以為專業能力更強，但教授指出，裙裝比褲裝更容易俾人更積極嘅第一印象。

女性如果想喺專業形象同女性魅力之間維持平衡，可以揀裙裝為自己建立良好印象，令自己睇落更有自信、適應能力更強。

男性衣著打扮

相比起女性，男性喺職場上嘅打扮選擇較少，社會可能會定型成功嘅男性打扮為，相對較短頭髮，著恤衫同埋打tie。如果男性以其他形象示人，就可能會俾人冇咁專業嘅印象。

我哋啱啱出咗手機app呀～方便各位IT人搵工，快啲撳下面條link download啦！

Download: https://sickleavetmr.com/web/download-app/

立即Follow我哋，搶先收睇各類文章！

Instagram: https://www.instagram.com/sickleavetmr_official/

Facebook: https://www.facebook.com/sickleavetomorrow/

各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！