以為HR坐喺office懶懶閒？實際成日忙到無停手！呢頭要計糧計假，轉頭又要忙離職同請人手續，事無大小幾乎都關HR事……其中最重要嘅工作，就係幫同事處理強積金供款，萬一計錯或供遲咗就麻煩啦！

而家有個好消息，「積金易」平台（eMPF）已經喺今年6月底推出，頭兩間強積金受託人亦已經先後加入咗平台，強積金帳戶資料會逐個由現有嘅強積金受託人系統轉到eMPF！喺2025年底前逐個上台，各位HR嘅「巴打」、「絲打」，記住幫老闆mark住個時間表啦！

eMPF嘅功能真係超全面，以後無論為現有僱員參加強積金計劃、登記新僱員、供款或其他MPF嘅行政工作，都可以一站式輕鬆處理晒！講到eMPF嘅新功能，首推佢個自動計算供款功能，仲有埋供款到期嘅電子提示，兼且可以批量上載同事登記！減輕大家嘅文書workload，避免埋人為錯誤嗰下抵讚嘛！最正係以後一個平台集中管理所有強積金計劃，最啱參加咗超過一個強積金計劃嘅公司，直頭係各位準時收工嘅救星！

仲未輪到你哋公司個計劃上台？不妨早啲做定功課，mark實下面4個貼士，到時咪可以大大聲同老闆講「『積金易』？其實唔難」囉：

1. 未到你註冊？事先學定點用eMPF

第一個貼士，就係慢慢嚟唔駛急！你公司參加嘅強積金計劃，唔駛急住註冊，事關你嘅強積金計劃仲未加入eMPF，所有行政同供款安排會維持不變，繼續由受託人處理；等你個計劃加入平台之後，就可以第一時間註冊，開始喺eMPF處理呢啲工作㗎啦！

我明喎，作為一位專業嘅HR，梗係早啲預備定啦，萬一畀老闆問到口啞啞點算？放心，「積金易」網站上面有晒教學工具，畀你預先做定功課！私心推薦埋佢哋個「外展服務」，有成team人standby畀你預約，一蚊都唔駛你出，仲要好服務親自去到你公司嚟教你哋點用，梗係報咗先唔好執輸啦，到時一埋位咪識得點樣註冊、點樣供款囉！

2.確保HR系統銜接eMPF

唔單只HR要準備，你公司嘅IT vendor都要on the same page㗎！特別係如果你公司有用開HR系統做payroll或者強積金admin嘢，就係時候同佢哋瞭解定個system點樣銜接eMPF。

eMPF承辦商特別準備咗一份技術規格文件（technical specifications），幫各位瞭解點樣更新而家用緊嘅HR系統同software！Confirm啲檔案全部啱晒格式，之後要同eMPF對接就no problem啦！大家可以預先透過電子表格登記索取呢份技術規格文件㗎，咁咪多啲時間畀IT同埋vendor做定準備囉！

3. Mark實資訊包嘅eMPF啟動碼

你公司嘅強積金受託人會喺加入平台前大約兩至三個月，向你哋發放eMPF資訊包，到時候就可以跟指示註冊啦！

資訊包好重要㗎！收到記得要拆嚟睇，千祈唔好整唔見！裏面有組eMPF啟動碼，註冊嗰陣用佢就可以skip咗唔駛再填公司資料，名副其實係「懶人包」！註冊完，當強積金計劃正式加入平台，你公司嘅僱員、工資組別、自動轉帳安排等資料，就會自動波轉移晒去eMPF㗎啦！

4. 注意！加入eMPF後，支票供款寄畀邊個?

到你公司參加嘅強積金計劃正式加入平台，就記住要轉去eMPF處理強積金嘅admin嘢啦！最緊要梗係供款唔甩得啦，好在eMPF可以畀你透過電子方式供款，方便之餘，仲唔駛好似以前咁擔心張cheque幾時寄到。

如果老闆暫時仲係想開cheque咁點算好呢？咁就要記住eMPF支票繳付供款嘅新安排：支票收款人keep住一樣唔變，但係張cheque就要寄去積金易平台公司（尖沙咀郵政局郵政信箱98929號），或者親身交去「積金易」三間服務中心嘅投遞箱。仲有，支票背面記得要寫上「強積金供款帳單號碼」或積金易「提交參考編號」，最好寫埋公司嘅積金易「僱主帳戶號碼」，呢啲重要資料如果唔齊或者唔清楚，就有可能阻慢供款程序㗎啦！仲要記住，上咗平台之後，記住千祈、千祈、千祈唔好將cheque再寄畀受託人啊！順帶一提，每個受託人接受嘅付款方法可能都有少少唔同，有咩唔清楚就上eMPF網站嘅「付款方法」版面睇下啦！

仲想知多啲eMPF嘅嘢？即刻上佢哋個網站（www.empf.org.hk）睇真啲，而家做定功課啱㗎啦！