一份好工除咗睇薪酬福利同工作內容外，公司嘅文化都好影響員工嘅返工心態。充滿自由嘅工作環境一直係打工仔夢想，而日本一名公司老闆就秉持「員工至上」主義，除咗返工放工唔使打卡，公司入面仲有間雜貨店！佢建立咗自由嘅工作文化後，意外獲得比原本好廿倍嘅生意額！
位於日本岐阜縣岐阜市嘅印刷加工公司「坂口捺染」，老闆坂口輝光喺2004年上任嗰陣，公司只得15人，生意額大約係270萬港幣。後來，喺2014年，佢決定進行「勞動改革」，員工可以擁有更大嘅自由度同彈性。亦因為咁，公司規模迅速擴增，而家公司坐擁160名員工，生意額高達約5,500萬港幣，成為業界數一數二嘅大公司。
佢主張嘅「員工至上」主義包括自由返工放工時間，佢話員工可以同屋企人悠悠閒閒食個早餐，或者送完小朋友返學再返工，咁樣員工就可以兼顧好家庭同工作兩方面。另外，如果員工因家務、身體不適臨時請假，佢都會批准。老闆亦唔鍾意員工開OT，佢希望員工夠鐘放工就返去陪屋企人，或者做自己想做嘅事。而當老闆招聘新員工時，對年齡都冇乜要求，只要態度積極就Ok，公司仲有2位分別係78同86歲嘅高齡員工添！
除咗工作上嘅制度，坂口輝光仲喺2021年喺公司入面開咗間雜貨店！店內會售賣價格實惠嘅飲品、雪糕同文具等，員工可以同小朋友一齊嚟買嘢，甚至帶埋小朋友返工都冇問題呀！
坂口輝光仲透露，嚟緊佢將會用大約830萬港幣買公司附近一塊1,200平方米嘅土地，預計起一棟複合式設施，裡面將會有托兒所、咖啡店、Gym房等，專畀員工使用，希望員工返工嘅時候會更加開心同放鬆。
小編表示，返工返到好似度假咁，真係開心死人咩！其實公司對員工好啲，員工自然對公司忠心，做嘢仲上心啲落力啲添，連帶公司嘅流失率都降低埋！職場上仲有啲咩心理技巧可以減少人才流失？延伸閱讀：https://shorturl.at/btGU9。
Follow SICK LEAVE TOMORROW to know more about workplace information!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
Download SICK LEAVE TOMORROW application:
https://sickleavetmr.com/web/download-app/
