喺全球生育率最低嘅國家之一——日本，有一間知名企業「伊藤忠商事」因禁止員工開OT，而令利潤喺10年後激增5倍幾！仲間接提高咗生育率，每名女員工平均至少生2個小朋友，遠超日本全國生育率，變成國家「典範」！
據《彭博社》報道，日本綜合貿易企業伊藤忠商事為咗提高員工工作效率，於2010年開始禁止旗下員工喺夜晚8點後開OT，亦唔會畀OT錢。每晚8點後，公司會有保安巡查，勸退仲未收工嘅員工，要求佢哋第日早少少返工繼續做，屆時先會畀額外OT錢。
誓估唔到，呢個禁令除咗成功令公司利潤大大增長5倍幾外，仲提高咗員工生育率。數據顯示，2010年至2021年間，伊藤忠商事平均每位員工為公司帶嚟嘅利潤增長咗5倍幾，同時亦有更多女員工願意生仔、放產假。截至2022年3月財政年度，該企業嘅女員工平均每人生2個小朋友，遠遠超過目前日本僅1.3嘅生育率。
報道指，除咗禁止OT，伊藤忠商事喺疫情期間仲實施咗每個禮拜兩日Work From Home嘅防疫措施。上年更將辦公時間由朝早8點提早至6點，咁員工3點就可以收工，避開人流提早返屋企，或者有充足時間進行其他活動，打造Work-Life Balance。
數據顯示，目前日本急速下滑嘅生育率，可能將於2040年造成1,100萬名勞動力流失，從而導致日本養老金及醫療保健體系崩潰。其實，香港生育率比日本更差。據聯合國最新報告指，香港目前生育率為0.8，屬全球最低。分析指原因與移民率增高、人口老齡化及女性遲婚或獨身有關。另外，香港嘅OT文化幾乎係世界聞名。政府統計處資料顯示，香港員工每周工時中位數為43.3小時，比正常嘅每周40小時多出3.3小時。
