維持咗3年嘅疫情，為全世界帶嚟好多轉變，包括企業嘅管理方式同職場文化。好多公司會為咗減低員工染病風險同提供work-life balance，推行WFH政策、4.5日工作週等。今次新鴻基引入無限有薪年假政策，依個消息引起唔少打工仔嘅討論，稱依種人事管理模式，令員工喺疫情下更有彈性。
早於2018年已開始推行
新鴻基有限公司由2018年已經試行無限年假政策，政策底下所有員工只要過咗試用期就可受惠，而申請有薪假更無需任何附帶條件，即使茶水姐姐同接待處職員都可享有福利。無限年假政策喺疫情間更成為常規政策。不過市場普遍認為，依類政策只係企業嘅一種包裝，實際上並唔可行。公司企業人才及文化主管車祉穎就表示，政策實際執行緊。佢本人今年亦曾經用有薪年假休息出遊，即使喺隔離政策下仍可出國放鬆一下，佢亦分享咗公司管理層同員工喺新制度下嘅做法。
傳統企業管理慣於標準化，彈性上班、無限有薪年假嘅諗法，往往俾人過於寬鬆甚至「無皇管」嘅感覺。但車祉穎強調：「政策係希望人事管理更靈活同人性化，而員工亦唔洗經常擔心假期唔夠。」
批假有3個標準
車祉穎坦言，除咗佢本人外，亦有其他部門同事放幾個月假，公司對同事放假抱鼓勵態度，曾舉行多次簡介會，協助管理層了解如何批核同衡量年假申請，至今並無員工因為年假問題向人事部額外請示或討論。對於準則，車祉穎指前提係：（1）有冇預先通知主管、（2）可唔可以先做好手上工作同埋（3）同同事做好工作交接。佢強調同以往嘅批假標準相若，並冇因為假期係「無限」而要特別處理。
唔查問請假原因
車祉穎又表示，推行政策嘅目的係希望員工可以更彈性工作，達到「work-life balance」，公司對員工有信任，喺有需要嗰陣就可以隨時請假處理家庭同私人事務，亦相信員工唔會濫用公司嘅措施，所以公司冇特別嘅制度去監察員工有冇亂請假，亦唔會查問員工請假嘅原因，「唔會因為係無限有薪年假而問多啲點解你放假。」
資料來源：新鴻基有限公司
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
