有位打工仔喺網上討論區發文指佢有另一間公司嘅offer,要返工第一日先簽約,佢亦都即刻同現職公司講咗辭職。點知,喺last day嗰一日新公司突然打嚟因為某啲原因要收返個offer,搞到事主好狼狽,想同公司講唔辭職住。
《原文》//話說喺而家間公司都做左幾年,想轉下環境,所以就邊做邊揾緊工。早排in左一間公司,好快佢地就話要請我!仲已經傾好晒幾時可以入職,但合約果啲就到時第一日番工先簽。收到offer之後我就同而家間公司講辭職,可能因為講左辭職,所以都冇咩心機做野,好多都hea做畀佢,因為心諗之後都唔會再係到做。
點知臨last day,請我果間公司竟然打嚟同我講佢因為佢地公司一啲原因,唔請我啦!身邊啲同事都知道我要last day,我連散水餅都訂,冇諗到新公司咁樣臨時甩底!而家同現公司講唔辭職住嘅話有冇用呀!//
有部份網民指要睇同公司同事關係如何,關係唔錯應該冇乜問題,但同時遞信後冇乜心機做嘢都會影響到公司對佢嘅睇法:「一切都睇你同上面關係,所以例如臨走就hea做,人地有眼睇嘅」、「R爛臉咪ok」;但大多網民就覺得既然有去意,點解仲要留喺度,搵過其他工好過啦,留低遲早都會走:「你都諗住走,今日吾走都聽日走」、「繼續揾工,而家好多公司都等人做」、「走啦 咁樣留得低 到最後都畀人玩到再辭工,到時再補多句 “又辭工呀 ?」、「覆水難收,話走唔走。若果你面皮夠厚,唔介意同事背後笑你,咪賴死唔走。」
小編就覺得東家唔打咪打西家,講咗辭職又收返都幾肉酸,好似擺明自己冇其他offer咁,依個時勢搵工都唔難嘅,何況全世界都知你要走又買埋散水餅,冇得唔走啦。即使留低,老細們都知你有去意,升職加薪無望,仲有可能俾人針對添,只會令自己愈做愈唔開心。唔知大家又點睇呢?或者有冇人試過咁做?
資料來源:香港討論區
我哋啱啱出咗手機app呀~方便各位IT人搵工,快啲撳下面條link download啦!
Download: https://sickleavetmr.com/web/download-app/
立即Follow我哋,搶先收睇各類文章!
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話,就入嚟我地 sickleavetmr.com 啦!我哋有好多好工俾你揀!!