話說以前仲係讀緊書嘅時候,就有返啲零售嘅pt。由於有一啲人事調動,我哋舖頭經理走咗佬,成間舖都冇皇管,當我哋仲陶醉緊咁爽嘅工作環境,突然有消息話隔離分店嘅經理下星期會調過嚟我哋舖頭。作為小薯嘅我唔知佢咩來頭,咁就8下啲有經驗嘅同事Jason啦
我:「喂,嗰條友乜水?點解調過嚟嘅?」
Jason:「嗰條友好出名架,喺元朗舖俾人投訴到傻,成日都唔做嘢,淨係點啲pt做,連高層都好唔鍾意佢。」
我:「吓,咁點解唔炒鬼咗佢?咁鬼廢!」
Jason:「公司唔夠人嘛,加上佢好似係啲皇親國戚,所以炒唔到嘛~」
聽完之後,我就好唔想下星期嘅嚟臨,一來冇得遲到,二來肯定俾佢點死!
——————————————————————————————————————————————————————
嗰個Daivd就好鍾意R水吹嘅,但佢開頭冇R我,唔知係我對住佢個樣太閪定點,佢會成日同另一位pt Mary吹水。點知有一日我咁啱part David而嗰位Mary又冇返,變到David係咁同我吹水,開頭真係唔想理佢,係咁hea覆打發下佢算,之後佢見我都有應下佢,就開始亂嚟
David(指住個呀伯):「你睇吓依啲個樣一睇就知係咸咸濕濕出去偷食啦。」
我:「吓,咁你都知?邊有樣睇啊,咪吹水啦!」
David:「真架!好多男人結咗婚又好,未結婚都好,都一定會偷偷哋搵SP或者叫雞架!」
我:「好鬼嘔心,咁你都有呀?」
David:「我緊係冇~我對我老婆好專一架,我係咁俾佢食住,佢好惡架,我點敢~」
我:「咁咪得囉,一個願打一個願挨啫~」
(我心諗,真係好奇怪,無啦啦同我講SP又叫雞咁,關我鬼事咩大佬,R水吹都R個好啲啦,真係告你性騷擾啊!)
——————————————————————————————————————————————————————
經歷過嗰日,David疑似由Mary轉移目標到我身上,返工係咁R我吹水,又係講埋啲無聊嘅嘢,同埋呻吓另一位同事Dick幾廢咁(嗰個同事真係好Q蠢,做嘢又廢,教極都唔識,搞到我好鬼忟,所以有時都會同David圍爐講下佢幾廢咁)
David:「妖,對住佢真係好辛苦,講極唔明,又要爭住做!」
我:「係啊屌!嗰日教佢黐銀仔,都唔知佢唔明定做唔到,手都震晒,都黐唔到,激鬼氣!」
David:「你依啲都事少,教佢入會員成個星期都記唔到啲steps,入鬼錯晒…」
如是者,我哋傾咗成個下晝都係鬧個ft點樣廢,之後過幾日,佢唔知覺得傾咗幾句就好熟定點,就開始進一步行動。
過多幾日,我又好唔好彩咁part中David,咁冇啦啦企緊喺貨場嗰陣,佢就同同事講聲話帶我學嘢,之後就走咗過嚟搵我
David:「喂Cindy〜行啦,我哋去行街街〜」(我冇打錯,真係男人老狗同我講話去行街街,好撚嘔心!)
我:「吓,行咩街呀?」(我內心極度不安)
David:「唔係呀,你跟我過去睇下啲競爭對手標價,因為我哋通常會睇下人哋賣幾錢,如果平過我哋,要匯報俾公司知,再調整價錢架〜」
我:「哦〜咁點解要帶我去嘅?」
David:「咁舖頭冇嘢做好悶嘛,咪同行下順便睇下有冇嘢買返去。」
之後我就好唔情願咁跟咗佢去…
——————————————————————————————————————————————————————
去到競爭對手間舖,咁佢開頭就扮下嘢都帶我去睇啲舖頭都有賣嘅嘢,睇下價錢上有冇出入咁。之後就開始shopping mode睇下啲唔關事嘅零食嗰啲,咁我都真係睇下有啲咩零食啦,事關返工真係特別口痕。咁我就好鍾意食繽紛樂,經過見到就眼金金望住,然後唔小心俾David睇到,之後就問我
David:「咦〜乜你好鍾意食繽紛樂架?」
我:「哈哈,OK啦〜」
David:「我請你食啦,買幾包返去。」
我:「唔洗啦〜我怕肥。」
David:「唔緊要喎〜我請你啦,冇咩所謂。」
我:「真係唔洗啦〜」(講完就走開咗)
之後我哋又行咗去凍櫃嗰度,我見到我好鍾意嘅乳酪做緊特價,師奶心態嘅我緊係要買返兩杯啦,點知又俾個David望到,又問
David:「咦,依個乳酪好食架?」
我:「係呀〜好好食架依個,你可以買俾個女食〜」
David:「(佢拎咗兩杯)我都冇生女嘅〜」
我就心諗,咁奇怪嘅,明明記得佢講過有個女,之後諗諗下,我哋轉眼間到咗收銀,而佢手上亦多咗兩包繽紛樂,我就冇理佢,自己俾咗錢就返咗舖頭。點知,返到去入倉擺返啲嘢嗰陣,佢都入咗嚟,然後遞咗佢啱啱買嘅繽紛樂同乳酪俾我,話咩返工辛苦,請我食,仲叫我唔好俾其他同事知。
依個情況就真係尷尬啦,成件事好鬼,由於我太驚嘅情況底下,我就同咗某幾個較熟嘅pt講依單嘢,班pk真係冇人性,聽完淨係識得笑9我,話David想媾我乜乜柒柒,完全冇幫過諗點樣解決依單嘢…(未完待續)
——————————————————————————————————————————————————————
有任何返工遇到嘅奇怪/搞笑/難忘經歷,歡迎投稿:https://forms.gle/gX2kGmhzmbaYXRxt6