啱啱畢業嗰陣，成日見到好多Job Ad都話請人，仲要好多都話”Fresh graduates are welcome”，但每次見工都嫌我冇經驗唔肯請。大佬啊fresh grad邊會有經驗？
相信唔少打工仔都喺面試過程聽過呢句說話，我都係其中一位。畢業之後見過唔少工，時不時會聽到HR講「我哋想請返啲有經驗嘅人。」
我：「呢一刻雖然無相關嘅經驗，但我會認真去學，盡快學識要做嘅嘢，唔會花同事太多時間去照顧我。」
HR：「OK，有啲咩消息，我哋會再通知你。」
如是者，一次又一次嘅面試，一次又一次嘅石沉大海，甚至令我懷疑自己電話係咪壞咗，所以收唔到通知。但，明明日日都收到「先生你好，今期我哋銀行做緊低息貸款優惠⋯⋯」
當時搵工的確搵到懷疑人生，少不免要搵朋友呻。其中一個好朋友：「啲HR 慳啲啦，寫又寫請fresh grad，又嫌人無經驗。根本就係想用FG人工請有經驗人士，FG實係個個未做嘢之前已經天生有經驗啦！」
畢業兩個月後，其中一次second in尾聲時：「你點睇自己係一張白紙？」
正當以為又比人話無經驗時，面試官無等我答就搶先講：「其實我考慮你嘅原因，正正係你係一張願意俾我寫嘢嘅紙。好多自認為有經驗或者識好多嘢嘅人，往往唔願意去接納其他人俾佢嘅建議，因為佢哋只會用自已認為啱嘅一套去做。我更加願意比機會果啲虛心受教嘅人，我估你應該係，希望你唔好令我失望。」
果時我有諗過只係啲門面說話，點知兩日後收到電話通知話請我，仲要星期一就返得工。返工之後，原來IN我果位唔係HR，而係大老細Stephanie。
我好感激比機會我嘅Stephanie，佢簡直當咗我係仔咁照顧，係咁比機會我學唔同嘅嘢，甚至會比啲大project我呢個小薯去做PIC。返咗一年左右，仲主動寫咗封reference letter比我，話驚遲下要果陣佢無時間又或者移咗民，如果將來我想去其他地方發展的話，一定會支持我（當時我仲做緊，無辭過職）。果刻已經唔理咩男人老九面子問題，流足一公升眼淚。
今時今日，我仍然想同Stephanie講：「多謝你無好似其他HR咁嫌我無經驗。仲有啊，我最近升職為Manager喇，有你先有今日嘅我，希望你係英國嘅生活愉快！」
係呢到都想同咁多位HR講，當遇到求職者無相關工作經驗或者fresh grad時，不妨了解多啲佢哋嘅性格，所講無經驗，正正因為佢哋新，接受公司training／做嘢既時候唔會帶埋舊公司既文化／習慣黎新工作，對於適應公司反而有機會比有經歷嘅人快。
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
