上次講過我哋條team有位UI/UX designer Amy,佢嘅智商真係大家有目共睹,可以吹到佢嘅鍵盤會冇咗個逗號,真係聽到R晒頭。好啦咁上星期有位新嘅UI/UX designer嚟咗,佢叫Mary,開頭睇佢個樣正正常常仲好斯文咁,以為佢會似返個正常人咁,冇Amy咁「特別」,識落真係發覺原來個個都係on_,冇個係正常嘅。
咁佢平時已經好「獨」,放假鍾意留喺屋企煲劇打機,要出街就會嗌晒救命咁。點知佢唔止「獨」仲好鬼「毒」,佢平時lunch time會食住飯睇Netflix,點知有一日佢竟然一路煲Strange Things一路打LOL…
然後因為公司廁所得兩格,如果要去辦大事嘅話會好易俾人知同埋會搞到廁所排長龍,所以喺公司屙都幾尷尬。咁有一日佢就問我哋會唔會忍住唔去,我哋就話唔會,有時會等lunchtime去隔離個商場屙。唔知佢係咪聽唔到lunchtime依個字,佢有一日4點幾就話要去廁所,咁我哋初頭都唔知佢係辦大事,見佢出咗房好耐都未返就估到佢要辦大事,咁我哋以為佢去公司嗰個廁所屙,終於等到佢返嚟,之後就俾佢笑死:
我:「終於返嚟啦喎」
Mary:「咦!你知我去辦大事呀?」
我:「你去咁耐點會唔知」
Mary:「係呀〜話說嗰個xx商場嘅廁所真係幾好喎,又多格數又唔太污糟!」
我:「吓,你特登行去嗰個商場屙?」
Mary:「係呀!你哋教我嘅」(一副天真嘅眼神)
之後我哋笑到傻,冇人會特登行過去屙,最多都只係lunchtime經過順便去,多數都會留喺公司屙…解釋完之後佢話我哋玩佢,冇講過係lunchtime先去。自此之後,佢一出去好耐我哋就會問佢係咪去咗商場廁所。
某一日,佢又嚟料…咁話說佢係用緊Magic Mouse,咁我諗大家都知Magic Mouse係用lightning叉電,同埋個lightning窿喺個底到,叉緊就用唔到,個設計超級唔user friendly。點知呀Mary有一日就用到個mouse冇電,爆出咗一番驚人嘅言論:
Mary:「咦!乜我個Mouse會冇電㗎?」
全部人呆咗咁望住佢,心諗自己係咪聽錯啲乜。。。依個時候Amy打破咗依個沉默嘅空間
Amy:「吓,你以為太陽能Mouse咩?」(佢嘅語氣十分串,可能因為有人代替咗佢個位)
Mary:「吓,我以為佢會自動叉電」
眾人:「吓…」
Mary:「乜佢唔係連藍芽㗎咩?咁唔係可以用藍芽嚟叉電?」佢個樣好真心咁問
我:「咩事呀,你真心定假膠…Magic Mouse係用條lightning叉㗎喎」
Mary:「吓,邊度有窿呀?」講完佢就自己搵,過咗冇耐
Mary:「咦!原來個底有個窿㗎?真係唔知添」
我哋全部都笑到抖唔到氣,Amy真係有接班人,Mary係真心膠。想知係咪所以UI/UX Designer都係咁on_,公司可唔可以請返個正常嘅…
有任何返工遇到嘅奇怪/搞笑/難忘經歷,歡迎投稿:https://forms.gle/gX2kGmhzmbaYXRxt6