故事改編自LIHKG 討論區《見工收到offer,我覺得被hr壓榨人工…》
*圖片非阿強本人
我係阿強,人如其名,個人幾強,今年城X大學Computer Science 1st HON畢業,讀緊大學嗰陣又有同同學Join下啲Project咁。畢業上台攞Cert嗰刻覺得有把老牛聲同自己講: 去吧孩子!經歷完你上半生嗰百零個七七四十九日,依張紙係你做人生贏家嘅開始,聽日你就係邁向有錢有樓有車有女嘅男人啦!
就係咁,同班麻甩佬去完個長洲grad trip 之後就開始係唔同嘅求職網開始搵有關行業嘅有關工作,越搵越唔對路…
當年睇連登話讀完IT出到黎基本上都高薪厚職幾皮幾皮咁,所以當時就諗都無諗直接簡IT嚟讀,依家睇番啲Job Ads,接受FG開價嘅都係得12K-18K,細公司同上市公司都差唔多。
唔見一次唔知咩料,覺得可能interview嗰陣會有Surprise,人工唔止依個Range。於是我send咗十幾份CV出街,隔左一個星期喺我食緊譚仔嗰陣終於收到一個HR電話(Btw 個HR姐姐把聲好L正),咁我chok哂聲咁ready我Pro嘅一面:
HR:「你好呀阿強,我係 唔蝕俾你Ltd. 打嚟,收到你份CV,想做我地Assistant個位喎!我地唔蝕俾你 Ltd.喺香港頭五十大上市公司(下省300字公司簡介)。依個位朝九晚七,番星期一至五,過左Probation有Group Medical,主要負責番(下省500字工作內容)」
佢一輪咀講咗一堆嘢出嚟我都聽唔到我想知嘅數字
我:「咁。。。請問一個月幾多錢人工,係唔係有雙糧/Bonus呀?幾多日假呀? 我見你個Post 15K。。。」
HR:「見你CV好似係今年FG,我地公司都歡迎FG嘅,好大空間俾啲新手學嘢,大假跟勞工署,年底睇KPI出Bonus,至於人工,你期望咩價?」
我Load左陣,佢強調我係FG,咁我又唔敢出太高,咁跟番個Post應該無死,我話我要求萬五
HR:「Um···咁你最低可以接受到幾多呀?」
下???15K都唔得???仲要再低啲??? 於是我怯怯地話最低12K
HR:「其實個人工都視乎番你嘅工作能力嘅,或者同你安排番個Zoom Interview先」
就係咁,我就同佢地公司做咗我畢業後第一個揾工interview,而佢地真係派左個12K嘅Offer俾我···扣埋MPF···我唔想諗。最後我同個HR姐姐講話我考慮下先⋯⋯
好似當初嗰把老牛聲越來越遠,係唔係FG真係會俾人壓價?定其實其他都係咁?
圖片來源:ViuTV《IT狗》