大家面試嗰陣，會有幾多成係講真話呢？研究指其實應徵者同面試官都會「講大話」，真係會一五一十、照實交代嘅比例唔夠5％。應徵者可能會誇大經歷、捏造專長、作假離職理由。面試官可能會美化企業文化，同應徵者講每天準時收工，實際上每日都不停OT。
University of Massachusetts Amherst 心理學教授，同時係《The Liar in Your Life》作者嘅 Robert Feldman 發現，喺短短10至15分鐘嘅面試中，80％以上嘅應徵者都唔會照實回答，平均會講2至3個大話。而顧問公司American Management Services嘅資深副總裁Louis Mosca就以主管嘅角度表示，包括佢在內嘅面試官，或多或少都會講少少大話，包括美化公司嘅真實面同發展前景。
應徵者自我美化嘅4個原因
1. 拉近距離
如果面試係喺面試官間房進行，好多應徵者睇到對方有咩物件，可能就會講大話，希望可以留低好印象畀對方，或者係拉近距離。
舉個例，面試官張枱擺咗去某地旅行嘅相，於是為咗拉關係，應徵者可能會講一句，「咦，我最近先去完嗰度」，藉此拉近距離。或者應徵者可能只係有運動習慣，但為咗迎合面試官，亂作自己都跑馬拉松。依啲大話睇嚟無傷大雅，但後來入咗公司之後，就會令人感覺講嘢唔可信。
2. 隱藏意圖
好多應徵者被人問：「點解想嚟我哋公司」嗰陣，會不由自主咁列出一堆理由，好似係好欣賞企業文化、想實現理想等等，但事實上，真正理由就係想要一份穩定收入。
但當面試官進一步問，企業文化到底邊一點吸引你嗰陣，答唔出反而會扣分。因此，除非真係好了解，不如直接咁答：「我希望有更好嘅待遇」。
3. 配合演出
應徵者往往會對企業預設立場，先假設對方係一個霸氣、強勢嘅企業，所以都勉強自己擺出自信滿滿嘅姿態。但格硬講自己嘅第二甚至第三外語能力好好，或者係數理能力好強，就算面試官一時唔察覺，或冇辦法即時考驗，入咗公司後都會露出馬腳。
4. 離職
調查發現應徵者多數唔會老實交代離職嘅準確時間，甚至刻意隱瞞自己先前空窗期有幾耐。好多人喺面試中講大話嘅原因，通常係因為離職時同上一間公司鬧得唔愉快。另外仲可能誇大自己之前嘅人工，希望可以喺新公司拎到更高人工。
面試官自我美化嘅2個原因
1. 營造正面形象
面試官往往話畀應徵者知：「我哋公司氣氛好好」、「大家都係一家人」。但入咗公司之後先發現，準時收工根本係天方夜譚，放假都要返工都係常態。
咁應徵者要點樣探問真相呢？《華爾街日報》建議，不妨用 ”pro and con approach“。先問下面試官佢願意回答嘅正面問題，例如「公司邊一點最受員工喜愛？」；跟住問負面問題，好似係「咁點解員工仲要離職？」心理學家表示，先正再反，往往令對方更願意講真話。
2. 塑造人才制度完善
待遇同升遷，以下面問答為例：
面試官問：「你前一份工嘅人工係幾多？」
應試者答：「3萬蚊。」
面試官繼續：「目前依個職缺人工冇咁高，但我哋公司嘅升遷機會好多，我相信以你嘅能力，應該好快就可以升職。」
而事實上，好多前例都顯示，新人喺入公司後，加薪或升遷根本冇面試官講到咁容易。因此先會有「魚唔過塘唔會肥」依個講法。
後生較多大話？
研究顯示，愈年輕嘅應徵者愈可能誇大其詞，因為佢哋嘅職場經驗不足，好多時候只好死頂。但與其亂作一啲自己冇嘅本事或經驗，倒不如舉出實際參加過嘅課程或義工活動，以及其他可能大派用場嘅軟實力，例如識得時間管理、人際溝通或者係專注力好高。
另一方面，因為單靠言詞好難判斷真偽，就算係肢體語言都唔完全準確，因此對應徵者或面試者嚟講，「具體」反而係一個幾好嘅指標。如果對方能夠舉出實例或細節，可信度就相對較高；如果講錯咗，會即刻更正嘅人，可信程度都相對較高。
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
