政府先前公佈最低工資最快喺今年5月上調至每小時$40，大家覺得追唔追得上生活成本呢？嶺南大學調查發現，年輕人嘅入息中位數為15,200元；而個人月均生活支出則為16,789元。4成接受深度訪談嘅青年自認貧窮，同時亦批評「最低工資」同現實市場脫節。
嶺南大學「青年貧窮與就業」研究團隊舊年對「在職貧窮」議題進行調查，喺舊年5月至12月先後透過兩輪深度訪談，訪問咗67位18至29歲、收入低於2萬元、有工作經驗嘅青年。另外，團隊亦透過兩輪問卷調查，分別收集到164份及253份有效回覆。
年輕人入息中位數：$15,200元 覺得自己嘅工資太低
根據《最低工資有幾低？貧窮新一代的就業困境報告》，絕大部分年輕人覺得自己嘅工資太低，待遇同工作唔相稱。受訪青年嘅收入來源包括全職工作、兼職工作，深度訪談年輕人嘅收入中位數為15,200元，而問卷調查嘅收入中位數係6,000至9,999元。一方面，大部分有全職工作嘅青年認為自己工時長、部分行業長期低薪，比唔上任職其他行業嘅同輩，而覺得不滿。壓力同時嚟自高昂嘅生活成本同遙不可及嘅人生目標，包括置業。
最低工資調整幅度太低
絕大部分做緊全職工作嘅受訪青年覺得最低工資調整幅度太低，自己未能受惠。無論認為自己屬於中產或基層嘅受訪者，都咁覺得，認為即使法定最低工資水平提升至40元依然係太低，同市場脫節，調整幅度唔合理。唔少人往往將最低工資時薪同「一餐飯」嘅開支掛鉤，認為最低工資水平要食得起「一餐飯」，即50至60元先算合理。受訪者認為最低工資如有合理升幅同政策檢討，對基層家庭同兼職工作者有好大幫助。
每月開支及理想時薪水平
問卷調查結果顯示，現時受訪青年嘅生活開支水平每月平均為16,789元，扣除教育開支，平均每月支出約14,894元，按一個月工作26日，每日8小時推算出時薪水平要係71.6元先足以維持；扣除應急儲備金，時薪要80.72元；包括應急儲備金，時薪要92.82元，同目前最低工資水平相差好遠。
4成青年自認係貧窮
嶺南大學研究報告指出，大約4成接受第二輪深度訪談嘅青年自認係貧窮，佢哋對於貧窮有多元化嘅理解。有青年認為三餐不繼先算得上貧窮，有啲人覺得人工未達到港人月入中位數就算係貧窮，亦有人認好多目標未能達成，導致「精神貧窮」。其餘自覺唔貧窮嘅青年部分歸因於家庭支援，可以滿足基本需求以外嘅消費，例如購物同旅遊。
嶺南大學倡改善青年在職貧窮問題
報告結尾提出幾個倡議改善青少年在職貧窮問題：
（1）全面檢討最低工資嘅政策定位同實際操作，因現時覆蓋率低，亦與勞動市場脫及政策定位模糊。
（2）提議需正視青少年勞工保障需求，因青少年唔喺現有嘅社會保障制度內，亦唔覺得政府嘅青年政策對佢哋有幫助，直接面對勞動市場嘅風險。
（3）重啟標準工時立法程序，青年斜槓族、自由工作者嘅工時更為唔穩定，因此絕大部分青年均認同香港急需立法規管工時。若該星期工時超過40小時，則加班嘅工資應為正常工資嘅1.5倍。工時法例應該訂立連續工時嘅上限。
（4）透明化最低工資嘅調整過程，並改為「一年一檢」，應該參考甲類消費物價指數，列為必然考慮因素。考慮以含通脹升幅及本地生產總值增幅嘅特定方程式為討論基礎。
（5）擴大及多元化低資委嘅成員名單。
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
